Tabaku refuzon rolin e kryetares së komanduar të PD-së

Deputetja e Partisë Demokratike, Jorida Tabaku, ka refuzuar të pranoj propozimin e Gazment Bardhit për drejtimin e komanduar të Partisë Demokratike.

Kështu ka bërë me dije ajo gjatë mbledhjes së mbajtur pranë PD-së këtë të martë të 6 qershorit, duke sqaruar se është momenti që theksi të vendoset te interesi i përbashkët.

Ndërkaq, Tabaku ka renditur disa propozime për ringritjen e PD-së.

Si fillim, ajo ka propozuar ngritjen e një grupi drejtues me 3 persona me eksperiencë, të cilët do të çojnë PD-në në zgjedhje nga poshtë-lartë.

Kjo, sipas saj, duhet të përfshijë dhe një proces ri-anëtarësimi duke pasur parasysh situatën reale në të cilën ndodhet partia.

Po ashtu ka propozuar hapjen e procesit të analizës dhe nisjen e një diskutimi me demokratët se ku dhe çfarë gabuam.

“E këtu kam fjalën një analizë reale politike me çdo kuti për të kuptuar potencialin e humbur dhe atë që mund të rifitojmë. Gjithashtu për të dhënë mundësi reale bashkimi në bazë përmes një proces reflektimi pasi ne nuk mund të jemi të hapur me disa”, ka theksuar ajo.

Sakaq, një propozim tjetër prej saj është digjitalizimi dhe modernizimi.

“Përhapjen e  Partisë Demokratike te të rejat edhe të rinjtë duke rivitalizuar dhe rishikuar përmirësimin e strukturave si ajo e FRPD, LDG edhe jo vetëm”, ka shpjeguar Tabaku.

Nga ana tjetër, ka folur për caktimin e 12 drejtuesve për të 12 qarqet të cilët do të fillojnë punën në terren dhe do të jenë në mbështetje të grupit drejtues të përkohshëm.

Si dhe rënien dakord me një proces për të promovuar njerëz të vjetër e të rinj me integritet, me meritokraci, pa skema e intriga.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.