Sveçla takon homologun maqedonas, flasin për sigurinë

Ministri i Punëve të Brendshme, Xhelal Sveçla, ka takuar të mërkurën homologun e tij maqedonas Panche Toshkovski, me të cilin ka biseduar për situatën e sigurisë.

“Në selinë e Ministrisë së Punëve të Brendshme në Shkup, të shoqëruar nga Drejtorët e policive të dy shteteve tona dhe Zëvendësministri Astrit Iseni, biseduam për situatën e sigurisë, sigurinë e kufijve, migrimin e paligjshëm dhe luftën ndaj krimit të organizuar”, shkroi Sveçla në Facebook.

Fenomenet negative që kanë karakterizuar brezin kufitar me Republikën e Maqedonisë së Veriut, sipas kreut të MPB-së, “janë në trend të rënies falë bashkëpunimit të ngushtë policor teksa janë shënuar rezultate të dukshme edhe në luftën e përbashkët ndaj krimit të organizuar”.

Sveçla potencoi se me Toshkovski-n ka biseduar edhe për mundësitë e zgjerimit të bashkëpunimit në kuadër të dy ministrive dhe “për këtë kishim pajtueshmëri të plotë të dyja palët”.

“Bashkëpunimi rajonal mbetet krucial si garancë e luftimit të suksesshëm të çdo ilegaliteti që cenon sigurinë e vendeve tona dhe rajonit tonë”, përfundoi.

Kjo është vizita e parë e një zyrtari të lartë të Kosovës në Maqedoninë e Veriut që nga koha kur në Shkup ka një qeveri të re, e drejtuar nga lideri nacionalist maqedonas, Hristjan Mickoski.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.