Sveçla garantoi se “kurrfarë negociimi” s’ndodhi më 24 shtator, por ICG-ja pretendon se u negociua ikja e Radoiçiçit

Një muaj pas sulmit në pjesën veriore të vendit, ministri i Punëve të Brendshme të Kosovës, Xhelal Sveçla, mohoi të jenë zhvilluar negociata mes palëve të përfshira në terren për t’ua mundësuar një korridor ikjeje terroristëve në fashtin Banjë të Zveçanit, por në një raport të fundit që u paraqit para Asamblesë Parlamentare të NATO-s sugjerohet e kundërta.

Në një konferencë për media në tetor të vitit të kaluar, derisa u pyet rreth pretendimeve se gjatë orëve kritike të 24 shtatorit u zhvilluan negociata për t’ua mundësuar largimin grupit terrorist serb, ministri kosovar insistoi se “absolutisht kurrfarë negociimi” nuk ndodhi mes palëve, porse për shkak të “terrenit jashtëzakonisht të rëndë” terroristët arritën të iknin për në Serbi.

Mark Lancaster, raportues në Asamblenë Parlamentare të NATO-s, në draftraportin që e prezantoi gjatë sesionit pranveror të këtij institucioni në Sofje të Bullgarisë, përfshiu edhe një raport të Grupit Ndërkombëtar të Krizave (ICG) në të cilin pretendohet se zyrtarë të KFOR-it negociuan për tërheqjen e një pjese të grupit të terroristëve serbë pas sulmit të 24 shtatorit.

Në raportin e ICG-së, ku jepen hollësi për sulmin terrorist të fundshtatorit të 2023-s në veriun e trazuar të Kosovës, zbulohet se KFOR-i ndërmjetësoi tërheqjen e pjesës së mbetur të grupit terrorist serb që sulmoi policinë, përfshirë ish-nënkryetarin e Listës Serbe, Millan Radoiçiç, ndaj të cilit ekziston edhe një fletarrest ndërkombëtar i lëshuar nga INTERPOL-i.

“Zyrtarë të KFOR-it negociuan tërheqjen e pjesës së mbetur të grupit në malet përreth, nëpërmjet të cilave ata u zhdukën. Autoritetet e Kosovës besojnë se potencialisht qindra sulmues të tjerë u  fshehën në malet mes Banjskës dhe kufirit të Serbisë, si dhe zbuluan arsenal të madh të armëve me kapacitet për të shkaktuar dëm dhe viktima të konsiderueshme”, pretendoi ICG-ja.

Ndryshe, sa u përket pretendimeve të ICG-së – një organizatë jo pa nam – rreth skenarit që mundësoi arratisjen e terroristëve, as autoritetet kosovare, por as misioni paqeruajtës në vend, nuk janë deklaruar akoma. Sëkëndejmi, rreth tetë muaj pas sulmit vdekjeprurës në veri, ende mbetet e paqartë se si mbi 40 terroristë arritën të largohen nga rrethimi i Policisë së Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.