Sveçla: Disa prej terroristëve të identifikuar janë pjesëtarë të organizatës “Mbrojtja Civile”

Ministri i Punëve të Brendshme, Xhelal Sveçla, ka folur para gazetarëve pasi ka vizituar vendin ku është vrarë rreshteri policor Afrim Bunjaku.

Ai ka treguar se disa prej terroristëve që janë identifikuar janë pjesëtarë të organizatës terroriste “Mbrojtja Civile”.

“Ka qenë grup terrorist, pasi kanë qenë të kyçur në akte terroriste, disa prej tyre të identifikuar edhe si pjesëtar të organizatës terroriste Mbrojtja Civile”, tha Sveçla.

Po ashtu Sveçla ka theksuar se Policia e Kosovës ka zbuluar një sasi të madhe të armatimit të rëndë, armatim këmbësorie, eksploziv, uniforma dhe pajisje për barrikada.

“Ishin pajisje për qindra sulmues. Kanë dështuar falë angazhimit të jashtëzakonshme dhe sakrificës së policëve të Kosovës”, shtoi ai.

“Përgatitjet ishin që në mënyrë masive të sulmojnë Policinë e Kosovës dhe institucionet e Kosovës. Brenda ka një numër pelegrinësh, jemi duke munduar që t’i identifikojmë ata”.

Ndryshe, pjesëtarët e Policisë së Kosovës janë futur brenda Manastirit të Banjskës në Zveçan – komunë e banuar me shumicë serbe në pjesën veriore të vendit – merr vesh Albanian Post, derisa dhjetëra persona janë kapur nga ekipet policore, porse ende nuk dihet nëse janë të gjithë anëtarë të grupit terrorist që ka sulmuar Policinë e Kosovës të dielën, duke lënë të vdekur një zyrtar policor.

Policia aktualisht është duke kryer procesin e identifikimit të personave brenda Manastirit të Banjskës, ngase siç është bërë e ditur edhe nga autoritetet kosovare, disa prej personave që kanë qenë brenda janë pelegrinë ortodoksë  e të tjerë dyshohet se janë persona që kanë bashkëpunuar me kryesit e sulmeve terroriste ndaj Policisë së Kosovës.

Aktualisht, strukturat e sigurisë po kryejnë një operacion policor kundër grupit të armatosur terrorist që ishin ngujuar në Manastirin e Banjskës që nga orët e para të mëngjesit, derisa tre terroristë janë vrarë deri më tash nga Policia e Kosovës, kurse gjashtë të tjerë janë arrestuar – dy prej tyre të plagosur.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.