Super Bowl është këtu – Çfarë duhet të dimë?

Është periudha më emocionuese e sportit amerikan dhe ka vetëm një emër: Super Bowl.

Këtë vit, dy ekipe jo favorite do të ndeshen në finalen e madhe të futbollit amerikan, për të rrëmbyer trofeun aq të lakmuar, Vince Lombardy.

Nga njëra anë, Los Angeles Rams-at, me një ekip të tejmbushur me yje.

Nga ana tjetër – në mënyrë krejtësisht të papritur – Cincinnati Bengals, të cilët me një yll të vetëm në ngjitje, Joe Burrow, do të kërkojnë lavdinë e sportit amerikan.

Bengals-at ishin edhe ndër ekipet me shanset më të pakta për të shkuar në Super Bowl. Ata ishin skuadra në disfavor në shumicën e ndeshjeve të luajtura. Por, me Burrow në ekip, asgjë nuk është e pamundur.

Ky është edhe viti i dytë për quarterbak-un e Bengals-ave, i cili në kohën kur luante në kolegj për LSU, nuk njihte humbje. I njëjti fat, duket se e pret edhe në karrierën e tij në NFL.

Rams-at nga ana tjetër, e kanë provuar finalen disa vite më parë nga New England Patriots, por pa sukses. Tashmë, ata rikthehen për të vendosur hegjemoninë.

Traineri i tyre, Sean McVay, mund të bëhet edhe menaxheri më i ri, i cili fiton trofeun.

Nga ana tjetër, është Zac Taylor, i cili sërish nuk është edhe aq i vjetër – 38 vjeç.

Në fakt, kjo do të jetë finalja, e cila sheh dy trajnerët më të rinj në historinë e Super Bowl.

Bengals-at kanë luajtur në dy Super Bowl-e të mëparshme. Të dy, i kanë humbur përballë San Francisco 49-ers.

Rams-at e kanë fituar një herë më parë titullin.

Një tjetër fakt interesant, është ai se për herë të dytë radhazi, finalja do të luhet në fushën e një prej ekipeve finaliste, atë të Rams-ave.

Vitin e shkuar, ishin Tampa Bay Buccaneers, ata të cilët fituan në shtëpinë e tyre, me Tom Brady në krye.

Ndërsa, shfaqja e pushimit të ndeshjes, do të jetë një ndjesi më vete këtë vit!

Eminem, Snoop Dog, Mary J. Blige, Kendrick Lamar dhe Dr. Dre, do të risjellin hite historike në skenë.

The @Pepsi Halftime Show is just three days away… #PepsiHalftime #SBLVI@drdre @eminem @snoopdogg @maryjblige @kendricklamar pic.twitter.com/NiTUNKdTJS

— NFL (@NFL) February 10, 2022

Të pasurit të pesë yjeve të tilla botërore në Super Bowl, është një gjë e rrallë. Aq e rrallë, sa biletat e këtij viti u shitën në shuma stratosferike, ku në tribunat më të largëta në fusha, shifra arrinte deri në 6 mijë dollarë.

Por sa herë mund të shohësh në jetë pesë legjenda të rap-it amerikan dhe një ndeshje Super Bowl-i të tillë?

Gjithçka është e parashikuar në organizim. E vetmja gjë që mungon, është emri i fituesit.

Rams apo Bengals? Kjo është pyetja!

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.