Suedia ka përmbushur detyrimet për anëtarësimin në NATO, thotë Stoltenberg

Sekretari i Përgjithshëm i NATO-s, Jens Stoltenberg u takua me Presidentin Recep Tayyip Erdoğan të dielën, ndërsa i pari synonte të nxiste anëtarësimin e Suedisë në aleancë.

“Turqia ka shqetësime legjitime për sigurinë. Suedia ka ndërmarrë hapa konkretë të rëndësishëm për të përmbushur shqetësimet e Turqisë”, tha Stoltenberg në një konferencë për shtyp pas takimit.

Lajmi u bë i ditur nga agjencia franceze “AFP”.

Duke iu referuar protestave të fundit të lidhura me PKK-në në Stokholm, Stoltenberg tha: “Liria e tubimit dhe e shprehjes janë vlera thelbësore në shoqëritë demokratike. Por ne duhet të kujtojmë pse po ndodhin këto”.

Takimi me dyer të mbyllura u zhvillua në Pallatin Dolmabahçe në Stamboll.

Aderimi i Stokholm-it është vonuar për shkak të kundërshtimeve nga vendet anëtare, Turqia dhe Hungaria.

Megjithatë, Shtetet e Bashkuara dhe NATO duan të shohin anëtarësimin e Suedisë përpara një samiti të NATO-s në kryeqytetin e Lituanisë Vilnius më 11-12 korrik.

Në një kthesë historike, Suedia dhe Finlanda braktisën politikat e tyre të vjetra të joaleancës ushtarake dhe aplikuan për t’u bashkuar me NATO-n pasi Rusia pushtoi Ukrainën.

Qershorin e kaluar, Turqia dhe dy vendet nordike nënshkruan një memorandum për të adresuar shqetësimet legjitime të sigurisë së Ankarasë, duke hapur rrugën për anëtarësimin e tyre përfundimtar në aleancë.

Ankaraja ratifikoi anëtarësimin e Finlandës në mars, duke i mundësuar asaj të bëhet anëtare e plotë e aleancës së mbrojtjes këtë javë.

Autoritetet turke kanë shprehur shpeshherë se nuk e kundërshtojnë zgjerimin e NATO-s, por kritikojnë Stokholm-in zyrtar për mosmarrjen e masave kundër elementëve që përbëjnë një kërcënim sigurie për Ankaranë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.