Suedia “duhet të ndërpresë lidhjet” me aleatët kurdë në Siri për të kapërcyer veton turke në NATO

Suedia duhet të ndërpresë lidhjet e saj me një milici kurde siriane ose Turqia do të vazhdojë të bllokojë aplikimin e saj në NATO. Ky ka qenë paralajmërimi i ambasadorit të Ankarasë në Stockholm, Emre Yunt, në mes të një krize të thelluar mbi përpjekjen e vendit skandinav për t’u bashkuar me aleancën e mbrojtjes transatlantike.

Ambasadori tha për “Financial Times” se ndërprerja e lidhjeve me Njësitë e Mbrojtjes së Popullit (YPG) ishte “më e rëndësishmja” e kërkesave të Turqisë pasi presidenti Recep Tayyip Erdogan habiti aleatët e tij në NATO duke thënë se ai nuk mund të pranonte anëtarësimin e Suedisë dhe Finlandës për shkak të mbështetjes së tyre për grupet që Turqia i sheh si terroriste.

Erdogan, i cili të mërkurën bllokoi vendimin fillestar të NATO-s për të përpunuar kërkesat e dy vendeve nordike për t’u bashkuar me aleancën ushtarake, i kritikoi ata për refuzimin e kërkesave turke për ekstradimin e 30 personave të akuzuar për lidhje me grupet terroriste.

Por Yunt tha se Ankaraja dëshironte që Stockholm-i, i parë nga zyrtarët turq si një problem më i madh se Helsinki, të shkonte më tej. “Ata duhet të ndërpresin lidhjet e tyre me YPG – Njësitë e Mbrojtjes së Popullit që kanë lidhje me kurdët”, tha ai. “Kjo është më e rëndësishmja”.

YPG-ja është një milici e armatosur kurde që udhëhoqi fushatën kundër ISIS-it në Siri, pasi grupi xhihadist pushtoi pjesë të territorit në vitin 2014 dhe udhëhoqi sulmet terroriste në të gjithë Evropën. Ajo mori armë dhe trajnim nga koalicioni anti-ISIS i udhëhequr nga SHBA-të, i cili u mbështet me trupa nga Suedia.

Por YPG-ja ka gjithashtu lidhje të ngushta me Partinë e Punëtorëve të Kurdistanit (PKK), e cila ka zhvilluar një luftë të përgjakshme të armatosur kundër shtetit turk që nga vitet 1980 dhe njihet si një organizatë terroriste nga Suedia, si dhe nga BE-ja dhe SHBA-të. Mbështetja perëndimore për grupet që janë të lidhura me të ka qenë prej kohësh një burim zemërimi në Turqi, si midis zyrtarëve dhe publikut.

Zyrtarët suedezë kanë argumentuar më parë se forcat kurde siriane kanë luajtur një rol vendimtar në luftën kundër ISIS-it dhe janë të rëndësishme për stabilitetin e Sirisë.

Por Yunt, i cili ka shërbyer si ambasador i Turqisë në Stockholm që nga viti 2017, tha se Ankaraja ishte e zemëruar që Ministri suedez i Mbrojtjes dhe zyrtarë të tjerë të lartë kishin zhvilluar diskutime me komandantët e YPG-së në vitet e fundit. “Ata po pretendojnë se ky grup po lufton me Daesh-in”, tha ai, duke përdorur akronimin arab për ISIS. “Por Daesh nuk ekziston më”.

Kërkesat e Ankarasë paraqesin një dilemë për Suedinë pasi ajo përpiqet të zhbllokojë ofertën e saj për anëtarësim në NATO, pa u parë në vend si duke bërë shumë lëshime ndaj presidentit autoritar të Turqisë.

Qeveria socialdemokrate e Stockholm-it përballet me zgjedhje të vështira parlamentare në shtator dhe tashmë ka krijuar tension me të majtën e partisë së saj dhe ish-komunistët duke u anëtarësuar në NATO. Vendi ka një diasporë të konsiderueshme kurde dhe ka simpati të gjerë për çështjen kurde.

Kryeministrja suedeze Magdalena Andersson dhe presidenti finlandez Sauli Niinistö shpresojnë se presidenti amerikan Joe Biden, me të cilin ata do të takohen në Shtëpinë e Bardhë të enjten, mund të zhbllokojë procesin. Disa analistë kanë sugjeruar se Turqia mund të shpresojë të bëjë presion ndaj SHBA-ve për të dhënë miratimin për kërkesën e saj për të blerë avionë të rinj luftarakë F-16.

Por Yunt tha se qëndrimi i Turqisë ndaj Suedisë “nuk kishte të bënte me marrëdhëniet tona me Shtetet e Bashkuara”.

Andersson përsëriti të martën se donte të fliste me Erdogan-in dhe premtoi një kapitull të ri në marrëdhëniet midis dy vendeve. Megjithatë, Yunt paralajmëroi se, “duke folur me ne pa ndryshuar politikën e tyre nuk do të arrihet asgjë”.

E pyetur për të komentuar kërkesën turke, ministria e jashtme e Suedisë tha: “Një seri përpjekjesh diplomatike janë duke u zhvilluar. Nuk kemi koment të mëtejshëm”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.