Lajme

Suedia: Anëtarësimi në NATO zvogëlon rrezikun e konfliktit – rishikimi i politikave


Ushtarë suedezë në rrugët e ishullit strategjik të Gotland në fillim të këtij viti mes tensioneve midis NATO-s dhe Rusisë

Një ditë pasi liderët e Finlandës thanë se vendi i tyre duhet të kërkojë anëtarësimin në aleancën ushtarake, politikanët suedezë thonë se anëtarësimi në NATO do të kishte një “efekt parandalues ​​në Evropën Veriore”.

Ishte ministrja e Jashtme e Suedisë, Ann Linde, e cila deklaroi se një rishikim nga të gjitha palët i politikës suedeze të sigurisë arriti në përfundimin se anëtarësimi në NATO do të kishte një efekt stabilizues dhe do të përfitonin vendet përreth detit Baltik.

Anëtarësimi suedez në NATO do të rriste pragun për konflikte ushtarake dhe kështu do të kishte një efekt parandalues ​​konflikti në Evropën Veriore”, u tha Linde gazetarëve kur prezantoi një raport parlamenti mbi sigurinë.

Raporti nuk përmban asnjë propozim, por ministri i Mbrojtjes, Peter Hultqvist, paralajmëroi se: “Nëse Suedia zgjedh të kërkojë anëtarësimin në NATO, ekziston rreziku i një reagimi nga Rusia”.

Ndërsa vijoi se Suedia është e përgatitur të përballet me kundërpërgjigje nëse një rast i tillë ndodh.

Kryeministrja suedeze, Magdalena Andersson, pritet të thërrasë një mbledhje të posaçme kabineti, ku do të merret edhe vendimi zyrtar për të aplikuar.

Nëse vendi nordik anëtarësohet zyrtarisht në NATO, ai do t’i japë fund mbi 200 viteve të mosangazhimit suedez.

Çfarë do të thotë kjo për marrëdhëniet NATO-Rusi?

Do të ishte një pengesë e rëndë për presidentin rus Vladimir Putin, i cili përdori zgjerimin e aleancës ushtarake mbrojtëse të Perëndimit si pretekst për luftën e tij në Ukrainë.

Të enjten, fqinji i Suedisë, Finlanda bëri lëvizjen e parë drejt anëtarësimit në aleancë.

Fill pas kësaj, Ministria e Jashtme e Rusisë tha se anëtarësimi i Finlandës në NATO do të “shkaktonte dëme serioze në marrëdhëniet ruso-finlandeze, si dhe stabilitetin dhe sigurinë në Evropën Veriore”.

Kremlini kishte paralajmëruar më parë për “pasoja ushtarake dhe politike”, nëse Suedia dhe Finlanda vendosin të bëhen anëtarë të NATO-s.

Kufiri tokësor i NATO-s me Rusinë do të dyfishohet nëse Finlanda dhe Suedia dorëzojnë aplikimet e tyre për anëtarësim.

Një zgjerim i tillë nga aleanca ushtarake perëndimore do ta linte Rusinë të rrethuar nga vendet e NATO-s në Detin Baltik dhe Arktik.

/Albanianpost.com


Lajmet kryesore