Lajme

Studentët holandezë krijojnë makinën elektrike që e ‘zhduk’ karbonin


Makina sportive tërësisht elektrike e krijuar nga disa studentë holandezë është unike. Ajo filtron më shumë karbon sesa lëshon.

“Qëllimi ynë përfundimtar është të krijojmë një të ardhme më të qëndrueshme”, ka treguar Jens Lahaije, nga ekipi studentor i Universitetit të Teknologjisë Eindhoven që krijoi makinën.

Nën emrin ZEM, për lëvizshmëri me emetim zero, 2-vendëshja strehojnë një paketë baterish litium-jon Cleantron dhe shumica e pjesëve të saj janë të printuara në 3D nga plastika e ricikluar.

Sipas Lahaije, objektivi kyç është të minimizohet dioksidi i karbonit i emetuar gjatë jetëgjatësisë së plotë të makinës, nga prodhimi deri te riciklimi.

Automjetet elektrike me bateri nuk emetojnë pothuajse asgjë gjatë funksionimit në krahasim me automjetet me motor me djegie.

Mirëpo, prodhimi i qelizave të baterisë mund të krijojë aq shumë ndotje sa që automjeteve elektrike mund t’u duhen dhjetëra mijëra milje për të arritur “barazinë e karbonit” me modelet e krahasueshme me lëndë djegëse fosile.

Ndërkohë, modeli ZEM përdor dy filtra që mund të filtrojnë deri në dy kilogramë dioksid karboni mbi 20 mijë milje vozitje.

Dhe ekipi i Eindhoven shpreson për një të ardhme kur filtrat mund të zbrazen në stacionet e karikimit.

Sakaq, studentët po e prezantojnë automjetin e tyre në një turne promovues në SHBA në universitete dhe kompani nga Bregu Lindor në Silicon Valley.

Marrë nga “Reuters”, përshtatur për “Albanian Post”.

/Albanianpost.com


Lajmet kryesore