Studentët e Mjekësisë në Komisionin e Shëndetësisë: Do ta çojmë në Kushtetuese

Studentët e Mjekësisë asgjë nuk mundi t’i ndali.

Ata nuk do të dorëzohen para punësimit të detyruar, por do ta kundërshtojnë ligjërisht.

Një nga studentet e universitetit të Mjekësisë ka thënë se çështja do të çohet deri në Kushtetuese.

“Çështja do të ndiqet në Kushtetuese dhe një bojkot i studentëve të Mjekësisë në tetor është ulje e madhe për intelektin në Shqipëri”, ka theksuar ajo.

“Nuk do të mbahen diploma peng”, ka ravijëzuar studentja.

Studentët e Mjekësisë janë duke folur në komisionin e Shëndetësisë për projektligjin e 5 viteve punë me detyrim.

Por ata vijojnë të këmbëngulin se janë kundër kësaj nisme.

“Ne do te përdorim çdo hap dhe formë ligjore për të kundërshtuar ligjin për 5 vite pune me detyrim për të marrë diplomën e Mjekësisë, nis nga bojkoti. Mos të kalojmë në këtë pikë”, ka thënë një tjetër student.

Sipas këtij të fundit, do të ketë pasoja. “1/3 e maturanteve në gjithë Shqipërinë do të ikin jashtë. Mendoni për zgjidhje efiçente, jo detyrim”.

Detajet teknike të projektligjit

Ministrja e Arsimit dhe Sporteve, Evis Kushi, ka dhënë detaje teknike të projektligjit për punësimin e detyrueshëm të studentëve të Mjekësisë.

Ministrja ka specifikuar ndër të tjera se projektligji në fjalë për shkak të emergjencës do të prezantohet në Kuvendin e Shqipërisë me procedurë të përshpejtuar.

E gjitha sepse në muajin gusht, të gjithë maturantët që duan të studiojnë programin Mjekësi e Përgjithshme, kanë provimin shtesë të digjitalizuar që do të zhvillohet në muajin gusht pranë Qendrës së Shërbimeve Arsimore.

“Ne duhet ta miratojmë brenda korrikut këtë projektligj, në mënyrë që ata përpara se të marrin vendimin dhe përpara se të bëjnë provimin, t’i dinë, t’i njohin të gjitha kushtet që do të kenë për sa i takon këtij programi”, ka dalluar ajo.

Sipas saj, studentët e vitit të parë apo kandidatët për studentë, përpara regjistrimit, ata që shpallen fitues, përpara regjistrimit në universitet do të nënshkruajnë një marrëveshje me UMT me MAS dhe MSHMS.

Kjo, për tu angazhuar që do të qëndrojnë 5 vite për punësim pas diplomimit të tyre në Shqipëri, në institucionet shëndetësore të vendit.

Dhe se diplomën do ta tërheqin pas përmbushjes së këtij detyrimi.

Për studentët që janë aktualisht në sistem, Kushi ka dalluar se nga viti i dytë deri në vitin e gjashtë, përsëri në fillim të këtij viti akademik do të nënshkruhet një marrëveshje ku angazhohen që do të qëndrojnë.

“Përkatësisht, studentët nga viti i dytë deri në vitin e katërt, tre vite, ndërsa studentët e vitit të pestë dhe të gjashtë, dy vite, punësim në Shqipëri”, ka sqaruar ajo.

Po ashtu, edhe për këtë kategori, diploma do të tërhiqet pas përmbushjes së këtij detyrimi.

Ministrja ka shpjeguar gjithashtu se studentëve që janë aktualisht në sistem, do tu ofrohet edhe mundësia që nëse nuk janë dakord të nënshkruajnë marrëveshjen, të paguajnë sa është kostoja reale e çdo viti akademik, për vitet e mbetura akademike, jo për vitet që kanë kaluar.

“Ky është detyrimi që kanë studentët e vitit të parë, nuk kanë të drejtë zgjedhjeje, por do që qëndrojnë për 5 vite”, ka theksuar Kushi.

Ministrja u ka drejtuar thirrje të gjithë kandidatëve që kanë vendosur të studiojnë për programin Mjekësi e Përgjithshme, ta mendojnë që nëse zgjedhin të studiojnë në universitetin shtetërore, duhet të nënshkruajnë këtë marrëveshje.

Dhe se kanë detyrimin që 5 vite të qëndrojnë të punësohen në Shqipëri. Kurse studentët e tjerë mund të zgjedhin mes dy alternativave.

“Qëllimi ynë është që të gjithë studentët nga viti i parë deri në vitin e gjashtë të qëndrojnë të punojnë, të japin kontribut për vendin, sepse në fund të fundit ky është një detyrim që e kemi për të gjithë, për të plotësuar nevojat që kemi për mjekë”, ka dalluar ajo.

Lidhur me specializimet, në rast se janë të pambuluara nga MSHMS, pra nëse specializantët e paguajnë vetë kuotën, do të konsiderohet periudhë punësimi.

Ndërsa në rast se është e mbuluar nga MSHMS, ata nënshkruajnë një marrëveshje me MSHMS përpara specializimit, kështu që kanë detyrimin të përmbushin ato detyrime që tashmë janë në fuqi, sipas saj.

Referuar ministres, nëse për një vit nuk arrihet të plotësohet detyrimi për punësimin e tyre, atëherë të gjithë studentët, të diplomuarit do të lirohen nga ky detyrim dhe do të tërheqin diplomën e tyre.

“Trajtimi i veçantë konsiston në dy drejtime kryesore. Së pari punësim prioritare në institucionet shëndetësore shqiptare dhe së dyti përfshirje në programet sociale të punësimit”, ka veçuar Kushi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.