Sekretari i Përgjithshëm i NATO-s, Jens Stoltenberg, pas vizitës në Kosovë, ka mbërritur në Serbi ku të martën pritet të takohet me presidentin serb Aleksandër Vuçiç.
Ai është pritur në aeroportin “Nikola Tesla” në Beograd nga ministri i Mbrojtjes, Millosh Vuçeviç.
“Sonte mirëprita Sekretarin e Përgjithshëm të NATO-s, Jens Stoltenberg, i cili do të jetë në një vizitë zyrtare në Republikën e Serbisë”, shkroi Vuçeviç në platformën X.
Stoltenberg pas takimit me Vuçiçin do mbajë një konferencë për media, ndërsa në kuadër të kësaj vizite do të takohet edhe me kryeministren Ana Brnabiç.
Ndërkaq pas takimit me me presidenten e Kosovës, Vjosa Osmani, Stoltenberg ka thënë se autorët e sulmit terrorist më 24 shtator në Zveçan duhet të mbahen përgjegjës, derisa ka theksuar se këtë mesazh do ia përcjell edhe autoriteteve serbe gjatë vizitës së tij në Serbi.
“Është i pa pranueshëm sulmi në maj, por edhe në shtator në Banjë dhe kjo është arsyeja që e kemi rritur praninë tonë dhe kemi dërguar edhe 1 mijë trupa të tjerë. Sigurisht NATO nuk është institucion i zbatimit të ligjit, pres që autorët të mbahen përgjegjës, ky ka qenë mesazhi im që nga maji dhe është përsëritur edhe pas rastit në muajin shtator. Do ta ngris këtë çështje edhe në Serbi. Duhet të sigurohemi që ky rast të mos përsëritet edhe njëherë”, tha Stoltenberg.
Ai ka treguar se NATO-ja po shqyrton mundësinë që ta rrisë numrin ushtarëve të KFOR-it në Kosovë dhe Ballkan.
Në anën tjetër, kryeministri Albin Kurti ka kërkuar nga Stoltenberg që NATO-ja të dalë sa me shpejt me konkluzione për sulmin terrorist të 24 shtatorit në Banjë të Zveçanit dhe kidnapimin e tre policëve në Veri të vendit më 14 qershor nga autoritet serbe.
“Kryeministri tha se këto dy raste dëshmojnë nevojën për të rritur sigurinë sidomos përgjatë kufirit ndërmjet Kosovës dhe Serbisë, teksa i bëri thirrje Sekretarit që NATO gjithashtu të dalë sa më parë me konkluzionet e hetimeve të saj të pavarura mbi rastin e rrëmbimit kriminal të tre policëve të Kosovës dhe sulmit terrorist në Banjskë të Zveçanit”, thuhet në njoftim për media nga Qeveria.
Stoltenberg: Autorët e sulmit në Banjë të mbahen përgjegjës – do e ngris këtë çështje edhe në Serbi
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
