Spanja mungoi në një grup prej 26 vendesh evropiane që nënshkruan një deklaratë të përbashkët kundër projektit të diskutueshëm të futbollit të Super League-s.
Përpara fillimit të Kongresit të 48-të të zakonshëm të UEFA-s në Paris, përfaqësues nga 26 vende evropiane kanë nënshkruar një deklaratë të rëndësishme duke theksuar nevojën për konkurrencë të hapur dhe respekt për meritat sportive dhe barazinë e mundësive.
Ndërsa letra, e nënshkruar nga ministrat e sportit nga e gjithë Evropa, nuk i referohet në mënyrë eksplicite Super League-s, e bën të qartë kundërshtimin e tyre ndaj konceptit.
Deri më tani, vetëm dy klube, Real Madrid dhe Barcelona, janë lidhur publikisht me projektin e Super League-s, një kompeticion që synon të zëvendësojë Champions League-n e UEFA-s ose të paktën të sfidojë seriozisht pozicionin e saj si liga kryesore e futbollit për klube në botë.
Në letër, ministrat “ftojnë organet drejtuese të sportit të organizojnë gara sportive sipas parimeve të hapjes, barazisë së mundësive, meritave sportive, lidhjes ndërmjet performancës vjetore në garat vendase dhe të gjitha garave evropiane, solidaritetit financiar, integritetit dhe drejtësisë”.
Kjo vjen pasi Gjykata Evropiane e Drejtësisë (GJED) vendosi në dhjetor se FIFA dhe UEFA kishin shkelur ligjin e konkurrencës duke bllokuar ligën e pavarur.
Liga e re, e cila përfshinte 12 nga klubet më të mëdha të Evropës, provokoi një reagim të zemëruar nga tifozët dhe një paralajmërim të ashpër (disa do të thoshin kërcënim) nga UEFA se klubet dhe lojtarët do të ndaloheshin nga garat elitare, përfshirë Kupën e Botës, nëse do të merrnin pjesë.
Më pas, 48 orë më vonë, nëntë nga 12 klubet, duke përfshirë gjashtë nga Premier League angleze, u tërhoqën dhe projekti filloi të humbiste vrullin.
Promovuesit e projektit, “A22 Sports Management”, nisën një sfidë ligjore përmes gjykatave spanjolle, të cilat e referuan çështjen në GJED. Kompania e përshëndeti vendimin si një fitore të madhe dhe premtoi të rifillojë turneun me një projekt të ri që do të përfshijë 64 ekipe nga e gjithë Evropa, të ndara në tre divizione me promovime dhe rënie.
Por shumë nga klubet e mëdha, madje edhe ata që i kishin dhënë mbështetje të kujdesshme sipërmarrjes së mëparshme, thanë se nuk do ta mbështesin planin e ri.
Dokumenti u nënshkrua nga ministrat e sportit të 26 nga 27 shtetet anëtare të Bashkimit Evropian. I vetmi vend që mungon është Spanja, ministrja e sportit e së cilës është Pilar Alegria.
Duke komentuar mungesën e Spanjës në listën e nënshkruesve, një burim nga Këshilli i Lartë i Sporteve spanjolle i referohet drejtpërdrejt Super League-s.
“Qeveria spanjolle ka vendosur të mos e nënshkruajë deklaratën… sepse çështja e Super League-s nuk është zgjidhur”, thanë spanjollët.
Spanja është i vetmi vend në BE-së ku procedurat ligjore janë në vazhdim në lidhje me ligën e pavarur, shtoi burimi. Në dritën e kësaj, presidenti i Barcelona-s Joan Laporta tha javën e kaluar se Super Liga “mund të fillojë sezonin e ardhshëm ose në 2025-2026, dhe nëse jo, unë do të rishqyrtoj gjithçka”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
