Shqipëria

SPAK dërgon në GJKKO çështjen për dy ish-anëtarët e Gjykatës Kushtetuese


Prokuroria e Posaçme Kundër Korrupsionit dhe Krimit të Organizuar (SPAK), të martën e 3 gushtit ka kërkuar gjykim nga Gjykata e Posaçme për çështjen ndaj dy ish-anëtarëve të Kushtetueses Fatos Lulo dhe Bashkim Dedja.

Lulo dhe Dedja akuzohen për kryerjen e veprës penale “Refuzimi për deklarimin, mosdeklarimin, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.

Gjatë muajit prill, GJKKO sekuestroi pasuritë e ish-kryetarit të Gjykatës Kushtetuese, Bashkim Dedja, dhe ish-gjyqtarit Fatos Lulo.

SPAK nga hetimi penal zbuloi se ata kishin në pronësi pasuri të paluajtshme, të cilat nuk i justifikonin me burime të ligjshme, apo pasuri që i kishin fshehur.

Fatos Lulos iu sekuestrua një dyqan 172 m2, i ndodhur në rrugën e Durrësit, Tiranë.

Po ashtu, Dedjas iu sekuestrua një apartament, me sipërfaqe 60 m2, i ndodhur në zonën Kryemedhenj, Njësia Administrative Golem Kavajë.

Për të njëjtën çështje, ata nuk bindën më herët as trupat e vetting-ut, që i përjashtuan nga sistemi i drejtësisë.

/Albanianpost.com


Lajmet kryesore