Skënderbeu me përmendore edhe në Mal të Zi

Busti i heroit kombëtar të shqiptarëve, Gjergj Kastrioti – Skënderbeu, do të vendoset edhe në Malësi – komuna e Tuzit, në Mal të Zi.

Lajmin e ka bërë të ditur kryetari i kësaj komune, Niuk Gjeloshaj.

Përmes një postimi në llogarinë e tij në rrjetin social, Gjeloshaj tha se “Gjergj Kastrioti – Skënderbeu, udhërrëfyesi i kombit shqiptar, kryeheroi dhe frymëzimi ynë i fuqisë dhe trimërisë, krenaria e qëndresës dhe bashkimit të shqiptarëve do të vendoset në vendin më të bukur që ka Malësia, në sheshin qendror, që njëkohësisht edhe sheshi do të fitojë emrin ‘Sheshi Gjergj Kastrioti – Skënderbeu’”.

Në tokën e vetë shqiptare, pohoi ai “do të rrijë krenar përballë Bratilës së Ded Gjon Lulit, pranë institucionit më të lartë arsimor, gjimnazit tonë, në rrugën kryesore të qytetit ku gërshetohen shkolla fillore, kopshti, Qendra kulturore-informative Malësia, shtëpia e shëndetit, si dhe së shpejti edhe të stadiumit të ri të qytetit”.

“Në këtë mënyrë, Skënderbeu nderohet duke e respektuar të kaluarën por edhe të shërbej që të jetë aty ku gërshetohen e ardhmja dhe zhvillimi!”, shkroi ai në “Facebook”.

Ndërsa, bëhet me dije se Kuvendi Komunal i Komunës së Tuzit e ka miratuar vendimin për vendosjen e shtatores së Skënderbeut pa asnjë votë kundër.

“Njëjtë sikur në kohën e tij, sikur edhe e meriton, në kuvendin komunal vendimi sot u soll pa asnjë votë kundër e as abstenim, të gjithë në sallë të kuvendit komunal ishin Për – Skënderbeu vjen në vend shqiptar, në tokë shqiptare të qeverisur nga parti shqiptare”, tregoi Gjeloshaj.

Përmendorja e kryeheroit të shqiptarëve, do të realizohet në bashkëpunim me diasporën shqiptare të Malit të Zi.

“Sheshin e financoi kryeqendra e shqiptarëve Tirana, përmendoren do ta realizojmë me diasporën tonë, si projekt të shumëpritur nga ata!”, përfundoi Gjeloshaj.

Ndryshe, Gjergj Kastrioti – Skënderbeu, që jetoi gjatë viteve 1405-1468, është personaliteti shqiptar që më së shumti i janë ngritur buste, si shenjë nderimi ndaj lavdisë së tij, ndaj luftës heroike që e kishte bërë në mesjetë për popullin shqiptar kundrejt pushtuesve osmanë, të cilët ishin superfuqia më e madhe e kohës.

Përveç se në kryeqytetet rajonale, si në Tiranë, Prishtinë e Shkup, Skënderbeu ka buste edhe nëpër kryeqendrat më të mëdha botërore.

Gjithashtu, ai është personaliteti që më shumti është shkruar për të, dhe kjo si nga historiografia vendore, po ashtu edhe ajo ndërkombëtare.

Skënderbeu do të vlerësohej gjatë kohës sa ishte gjallë, gjithashtu edhe pas vdekjes së tij. Papa Piu II është njëri nga kohanikët e Skënderbeut i cili do ta nderonte me vlerësimin si; Athleta Christi (Atlet i Krishtit). Papa Pavli VI – në vitin 1968, do ta vlerësonte figurën e Skënderbeut si një nga simbolet se si duhej ndërtuar Evropa.

Filozofi iluminist danez, Ludving Holberg, e përshkruan kështu Skënderbeu-n’ “Me një fjalë mund të thuhet: Skënderbeu ishte luftëtari, prijësi dhe njëkohësisht heroi më i madh në histori”. Kurse, një nga epitetet më të përdorur për Skënderbeu-n është “Mbrojtës i Qytetërimit Perëndimor”.

Për shkak që është pjesë e identitetit kombëtar të shqiptarëve, përkujtimi për Skënderbeun është i pashmangshëm. Figura e Skënderbeut do te shërbente si inspirim për gjenerata me radhë. Në një nga periudhat më të ndritura të kombit shqiptar; Rilindjes, ai do të ishte figura kyçe, përmes të cilit rilindësit do ta ngrinin vetëdijen kombëtare – duke u thirrur në lavdinë e tij dhe në të njëjtën kohë të jepte reaksion përbrenda vendit për t’iu kundërvënë pushtuesit Osman.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.