Skandali i gjakut të infektuar në Britaninë e Madhe nuk ishte një aksident: 30 mijë të infektuar e të paktën 3 mijë të vdekur

“Një fatkeqësi që mund dhe duhej të ishte shmangur.”

Shtatë vite hetim, një raport 2 mijë e 500 faqesh dhe në fund dënimi total dhe absolut i autoriteteve, nga qeveritë e deri te drejtorët mjekësorë të institucioneve të ndryshme.

Është dita e së vërtetës për 30 mijë viktimat e atij që përkufizohet si skandali më i rëndë në historinë e shëndetit publik britanik, përdorimi – në vitet ’70, ’80 dhe në fillim të viteve ’90 të gjakut të infektuar për transfuzione dhe procedura mjekësore.

Një praktikë që deri më tani ka shkaktuar më shumë se 3 mijë vdekje, duke përfshirë shumë fëmijë, dhe ka shkaktuar vuajtje dhe shkatërrime në dhjetëra mijëra familje.

Gjetjet e raportit të Brian Langstaff, gjyqtari i Gjykatës së Lartë që drejtoi hetimin, nënvizojnë se “ky nuk ishte një aksident”.

“Qeveri të ndryshme kanë fshehur të vërtetën dhe u kanë dhënë viktimave informacione të pasakta”.

“Më shumë se 30 mijë njerëz janë infektuar, më shumë se 3 mijë kanë vdekur: një total i destinuar të rritet sepse çdo javë ka më shumë vdekje”, specifikoi Brian.

Përpara sallës në Westminster, ku do të ketë një ceremoni në nderim të viktimave, mijëra njerëz u mblodhën të veshur me një bluzë të kuqe me fjalët “gjak i infektuar” për të mirëpritur një vendim fajësie dërrmuese ndaj institucioneve.

Këto të fundit, “pavarësisht se e kanë ditur problemin, kanë refuzuar të pranojnë përgjegjësitë e tyre, madje kanë shkuar deri aty sa të shkatërrojnë dokumentet kyçe”.

Shumë njerëz vdiqën duke besuar se asnjë kryeministër nuk do ta pranonte kurrë përgjegjësinë për atë që ndodhi.

Një komunitet thellësisht i dëmtuar dhe i plagosur është margjinalizuar dhe injoruar nga institucionet e krijuara për të mbrojtur të drejtat e tyre.

Në vitin 2022, presidenti i hetimit nënvizoi me një raport të ndërmjetëm se ai kishte zbuluar “dështime individuale, kolektive dhe sistematike” dhe rekomandoi që prindërve dhe të miturve që kishin humbur një të dashur t’u shpërndaheshin menjëherë 100 mijë paund secili.

Megjithatë, deri më tani, pavarësisht rekomandimeve “një plan për kompensim adekuat” nuk është krijuar.

Për ministrin e Thesarit, Jeremy Hunt, i cili në të kaluarën ishte Ministër i Shëndetësisë, ky është “rasti më i keq që është përballur ndonjëherë” në jetën e tij.

“Çdo politikan – tha ai – duhet të turpërohet që u desh kaq shumë për të pranuar faktet”.

Faktet, gjeneza e të cilave daton rreth gjysmë shekulli më parë kur, përballë mungesës së produkteve të gjakut, plazma u importua nga SHBA-të pa iu nënshtruar analizave të nevojshme, praktikë që u përsërit deri në fillim të viteve ’90.

Kjo pavarësisht alarmit të ngritur nga Organizata Botërore e Shëndetësisë, dhe që transmetoi hepatitin C dhe HIV te pacientët tashmë të cenueshëm.

Pasdite pritet një kërkim falje publike nga qeveria, ku në parlament do të flasë kryeministri Rishi Sunak.

Marrë nga “Corriere Della Sera”, përshtatur për Albanian Post 

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.