Lajme

“S’ka ikje masive të qytetarëve”, thotë Sveçla


Ministri i Punëve të Brendshme, Xhelal Sveçla.

Ministri i Punëve të Brendshme, Xhelal Sveçla, ka demantuar raportimet që po bëhen për ikje nga Kosova, përmes transportit me autobusë, pas liberalizimit të vizave për Kosovën, më 1 janar.

“Raportimet për “ikje masive” të qytetarëve tanë, veçanërisht përmes transportit me autobusë janë të pavërteta. Ato me ose padashje krijojnë panik te qytetarët dhe rëndom përdoren pastaj për qëllime politike e dashakeqe kundër shtetit tonë nga Serbia”.

Sveçla, përmes një shkrimi në rrjetin social ‘Facebook’, ka thënë se këto lajme janë demantuar nga të dhënat e institucioneve.

“Lajmet e tilla janë demantuar nga Stacioni i Autobusëve e po ashtu demantohen lehtësisht edhe nga të dhënat e Policisë së Kosovës/Departamenti i Kufirit, ku dëshmohet se nuk bëhet fjalë për “ikje masive” të qytetarëve tanë apo flukse të autobusëve”, ka shkruar ai.

Sipas ministrit, “35% më pak autobusë kanë dalur këtë vit pas liberalizimit të vizave sesa në vitin e kaluar”.

Ai tutje ka publikuar të dhënat aktuale që janë në Policinë e Kosovës, duke i krahasuar me të dhënat e vitit 2023.

“Sipas të dhënave nga pikat kufitare, nga 1 janari i këtij viti, kur vendi ynë gëzon të drejtën e lëvizjes së lirë pa viza e deri më sot, në Republikën e Kosovës nga të gjitha pikat kufitare kanë hyrë 3687 autobusë, ndërsa kanë dalur nga të gjitha pikat kufitare 2408 autobusë”.

“Për të dëshmuar se nuk bëhet fjalë për “ikje masive” por me raportime dezinformuese nga disa mediume të papërgjegjshme, për të njëjtën periudhë kohore, në vitin që lamë pas kanë hyrë 3511 autobusë ndërsa kanë dalur nga pikat kufitare 3731 autobusë”.

Ai ka shtuar se të gjithë qytetarët janë duke respektuar proceduar e udhëtimit pa viza.

Por, frika e largimit të kuadrove për punë dhe mundësi jashtë Kosovës posa të mundësohet udhëtimi pa viza, po del të jetë me bazë në shumë prej sektorëve të ekonomisë në Kosovë, por jo vetëm.

Për vetëm 15 ditët e para, një numër i madh i infermierëve, punonjësve të arsimit dhe punonjësve të sektorit privat tashmë kanë ecur jashtë Kosovës për të eksploruar mundësitë.

Vetëm në ditët e para të muajit janar, në media u raportua për largimin e 20 infermierëve nga Kosova, profesion ky që veçse është deficitar.

Nga Oda e Infermierëve të Kosovës (OIK), pyetur nga Albanian Post, thanë se s’mund ta konfirmojnë numrin e saktë, meqë akoma s’i kanë të dhënat e plota, por konfirmuan se bëhet fjalë për një shifër të përafërt me atë që doli në media.

Ndërsa, Jusuf Azemi, kryetar i Sindikatës së Pavarur të Sektorit Privat të Kosovës, përkundër se e kishte pritur që të ketë njëfarë largimi pas liberalizimit të vizave, thotë të jetë zënë krejtësisht në befasi, kur pa numrat e ditëv të para.

Eksodi i heshtur i profesionistëve nga Kosova

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore