Situata në qarqet më të prekura nga reshjet intensive, e përmirësuar

Situata në qarqet më të prekura nga reshjet intensive të ditëve të fundit ka një përmirësim të dukshëm.

Kështu rezulton nga të dhënat e fundit nga Qendra Kombëtare Operacionale e Emergjencave Civile në AKMC.

Në orët e fundit, ndërprerja e reshjeve ka sjellë tërheqje të ujit në sipërfaqet e përmbytura. duke reduktuar ndjeshëm edhe sipërfaqen e tokës nën ujë.

Në Bashkinë Shkodër, sipërfaqja e tokës me prezencë uji ka mbetur 1 mijë e 130 hektarë tokë teksa vijon tërheqja.

Sakaq, nuk ka banesa me prani uji.

Mbeten ende edhe shtatë familje të evakuuara nga 52 që ishin ditën e parë. 24 anëtarët e këtyre familjeve janë strehuar në konvikt.

Lumenjtë Drin dhe Buna janë brenda nivelit kritik dhe nuk paraqesin asnjë rrezik.

Në Bashkinë Lezhë mbeten katër banesa me prezencë uji, ndërsa sipërfaqja e përmbytur është 2 mijë e 350 hektarë.

Hidrovoret po punojnë me kapacitet të plotë dhe pa ndërprerje.

Në Droje, Shllinza, Tale, Ishull Shëngjin, Grykë Zezë dhe Gocaj nivelet e ujit janë nën kuotën kritike dhe hidrovori Balldre është brenda normave.

Punonjësit e OSHEE po punojnë për të rikthyer energjinë, pas shkëputjes si pasojë e motit të keq në disa zona të Gjirokastrës, Shkodrës dhe Kukësit.

Kurse në qarqet e tjera nuk ka probleme.

Mbështetja humanitare në zonat e prekura nga përmbytjet ka vijuar në bashkitë Pukë, Vau i Dejës, Lezhë, Shkodër, Malësi e Madhe.

Mësohet se janë shpërndarë 150 pako ushqimore në Pukë, 100 pako në Vaun e Dejës, 200 pako në Lezhë.

Në Shkodër janë dhënë 580 pako me detergjentë, 580 pako ushqimore, 15 ton bazë ushqimore.

Ndërsa në Malësinë e Madhe 362 pako ushqimore.

Prej datës 20 nëntor, kur nisën reshjet intensive janë akativizuar në terren 710 Forca të Armatosura, 605 Forca Zjarrfikëse, 454 Forca nga Policia Shtetit dhe 345 Forca Vullnetare,

Po ashtu 146 Forca të FNSH, ekipet e Shërbimit Mjekësor, 165 mjete të kalueshmërisë së lartë dhe zjarrfikëse, varka dhe motorbarka.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.