Sindikata me ultimatum për menaxhmentin e “Trepçës”: Rreth 80 mijë euro obligime ndaj minatorëve, të realizohen pagesat për një javë

Sindikata e Pavarur e Minatorëve të Trepçës, ka thënë se menaxhmenti i ndërmarrjes “Trepca”, ka rreth 80 mijë obligime ndaj tyre.

Përmes një komunikate për media sindikalistët kanë fajësuar menaxhmentin se po pengon aktivitetet e tyre dhe se shuma rreth 80 mijë euro është që minatorët kanë paguar nga paga e tyre.

“Të nderuar minator janë bërë tani e sa vite që Menaxhmenti i Ndërmarrjes Trepça Sh.A e pengon aktivitetin sindikal të Sindikatës së minatorëve të Kosovës në forma të ndryshme, duke filluar nga përndjekjet, shantazhet, presionet, kërcënimet, suspendimet, largimet nga puna etj”.

“Një formë tjetër pengimit të veprimit sindikal dhe përpjekjes për të zhbërë sindikatën është ndalesa e kuotizimit apo anëtarësisë sindikale. Duke penguar dhe pamundësuar aktivitetin sindikal vazhdimisht”, thuhet në komunikatë.

Ata tutje kanë sqaruar se kjo shumë ka ardhur deri në këtë pikë si rezultat i mostransferimit të këtyre mjeteve për vite me radhë.

“Si rezultat i mostransferimit të këtyre mjeteve për disa vite obligimi tanimë duhet të jetë rreth 80.000 mijë euro. E tmerrshme”.

“Këto janë mjete të cilat ne i paguajmë nga paga jonë, me djersen e ballit dhe të njëjtat nuk na i transferojnë në llogarinë sindikale, me tendencën e vetme përndjekjen e sindikalistëve, largimin e tyre nga sindikata dhe njëherit zhbërjen e saj”.

Sindikata ka kërkuar nga menaxhmenti që brenda një jave të realizojnë vlerën prej 80 mijë euro.

“Ne ju njoftojmë dhe bëjmë thirrje që nëse brenda afatit një javor nuk paguhet vlera e plotë e kuotizimit sindikal (që është paguar nga djersa jonë/ nga gjepi ynë/nga kafshata e familjeve tonë), ne do të ndërmarrim të gjithë hapat demokratik për të realizuar këtë të drejtë”.

“Bashkangjitur me këtë postim keni vetëm një pjesë të obligimeve që ndërmarrja Trepça Sh.A i ka Sindikatës së Pavarura të Minatorëve të Trepçës së Kosovës”, përfundon reagimi.

Pas mos-zbatimit të marrëveshjes nga pushteti me minatorët e Trepçës, të cilëve akoma s’u janë dhënë pagat e plotë, kryetari i Sindikatës së Trepçës, Ibrahim Januzi, në një përgjigje për Albanian Post, kishte thënë se “asnjëherë nuk i përjashtojnë veprimet sindikale”.

Ndërsa, shefja e Grupit Parlamentar të Vetëvendosjes, Mimoza Kusari-Lila dhe njëra nga negociatorët e grupit të deputetëve me minatorët e Trepçës që kërkoi që ata ta ndalnin grevën në këmbim të realizimit të kushteve të tyre e ka pranuar për Albanian Post se është në dijeni të mos ekzekutimit të pagave ashtu siç ishin marrë vesh me grevistët.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.