Sindikata e Policisë pas takimit me Sveçlën: Presim ngritjen e mirëqenies të çdo pjesëtari dhe përmirësimin e kushteve

Sindikata e Policisë së Kosovës, pas takimit që kanë mbajtur të mërkurën me ministrin e Punëve të Brendshme, Xhelal Sveçla dhe me drejtorin e Përgjithshëm të Policisë së Kosovës, Gazmend Hoxha, ka thënë se kanë diskutuar për situatën aktuale, gjendjen ekonomike të pjesëtareve e po ashtu edhe për kushtet e punës, ky takim ka ardhur pas dy protestave të Njësisë Speciale.

Sipas sindikatës, ky takim ka qenë “përmbajtjesor” dhe “konstruktiv”.

“Ministri Sveçla shprehu gatishmërinë për bashkëpunim me Sindikatën e Policisë së Kosovës, menaxhmentin e Policisë së Kosovës dhe Ministrinë e Punëve të Brendshme për trajtimin e kërkesave të paraqitura me shkrim, duke synuar ngritjen e mirëqenies së çdo pjesëtari të Policisë së Kosovës dhe përmirësimin e kushteve të punës”, thuhet në komunikatë.

Tutje nga sindikata është thënë se vazhdojnë ta përkrahin dialogun mes Qeverisë dhe punonjësve të Policisë, por që cështjet urgjente të këtij institucioni të sigurisë duhet të trajtohen.

“Sindikata e Policisë së Kosovës gjithmonë ka përkrahur dialogun social me Qeverinë e Republikës së Kosovës dhe përfaqëson të gjithë punonjësit e Policisë së Kosovës. Në takim u trajtuan edhe çështje të tjera të rëndësishme për përmirësimin e kushteve dhe mirëqenies në Policinë e Kosovës”.

Për herë të dytë, Njësia Speciale Intervenuese (NJSI/FIT) në kuadër të Policisë së Kosovës kishte protestuar në sheshin “Skënderbeu” në Prishtinë, më e 9 dhjetor me të njëjtat kërkesa të cilat nuk u miratuan në takimin që zhvilluan me kryeministrin e Kosovës, Albin Kurti më 15 nëntor.

Më 27 tetor, Qeveria e Kosovës prezantoi shtesat për rrezikshmërinë për pjesëtarët e Policisë së Kosovës.

Shtesat janë ndarë në shtatë kategori, varësisht prej pozitave të zyrtarëve policorë.

Për njësitë elitare, përkatësisht për Njësinë Speciale Intervenuese, Njësinë për Ndërhyrje të Shpejtë dhe Njësinë për Mbrojtje të Afërt, shtesat do të jenë prej 150 euro mbi pagën bazë.

Ndërkaq, për Njësinë për eksplozivët dhe deminim, Qeveria tha se shtesa do të jetë në vlerë prej 120 eurosh.

Këto shtesa, sipas ekzekutivit, do të aplikohen nga nëntori, pasi të hyjë në fuqi Ligji për Pagat.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.