Si shpjegohen rezultatet e sondazheve të fundit në Kosovë?

Të dërrmuara nga zgjedhjet e përgjithshme parlamentare të 14 shkurtit 2021, partitë opozitare në Kosovë, për një vit e gjysmë nën qeverisjen e Lëvizjes Vetëvendosje, nuk është se e morën veten shpejt nga “tronditja” që pësuan.

Megjithatë, në dy sondazhe të cilat u publikuan rishtas, njëri nga ‘UBO Consulting’ dhe tjetri nga ‘Pipos’, çuditërisht, partitë opozitare dalin shumë më mirë në matjen e opinionit publik sesa performanca e tyre reale, kurse Lëvizja Vetëvendosje, e cila vazhdon të proklamojë të arriturat e saj gjatë kësaj periudhe, ka pësuar rënie.

Përformanca e dobët e Qeverisë

Çdo parti në pushtet,  pashmangshmërisht do të përballet me paknaqësi qytetare dhe çdo parti opozitare mundohet t’i shfrytëzojë ato në mënyrë që ta kthejë opinionin publik kah vetja.

Pakënaqësitë politike, ekonomike e sociale ndaj çdo pushteti, çojnë drejt ndryshimit të disponimit të qytetarëve.

Sipas deputetit nga radhët e Lidhjes Demokratike të Kosovës, Driton Selmanaj, qeverisja e keqe e LVV-së dhe “lufta e hapur” e kryeministrit Kurti me të gjitha grupet shoqërore, është indikator i humbjes së përkrahjes për ekzekutivin dhe potencialisht, i rritjes së LDK-së.

“Ardhja e Vetëvendosjes në pushtet, qeverisja e keqe, mungesa e kapaciteteve dhe paaftësia e tyre qeverisëse e ka sjellë elektoratin në një situatë të gjykojë se çfarë po ndodh dhe të fillojë të dëshpërohet”, tha ai në një prononcim për Albanian Post.

“Kurti ka hap konflikt me të gjitha grupet shoqërore në Kosovë, prandaj të gjitha këto janë indikatorë që njerëzit kanë filluar të shohin dhe fillojnë të bindën që LDK nuk eksperimenton me vendin”.

Këtë arsye të thjeshtë në relacionin pozitë-opozitë e jep edhe Faton Abdullahu nga Partia Demokratike e Kosovës, i cili pohon se qeverisja e keqe e LVV-së, ka ndikuar në rritjen e përkrahjes për PDK-në.

“Për një vit e gjysmë qeverisje, qytetarët e Kosovës e kanë përjetuar zhgënjimin e madh nga kjo qeverisje pa vizion dhe pa kompetencë. Me këtë trend, deri në fund të vitit LVV do të vazhdojë rënien edhe më shumë”, ka potencuar ai, në një përgjigjje me shkrim për AP.

Nga ana tjetër, Muharrem Nitaj nga Aleanca për Ardhmerinë e Kosovës e sheh ndryshe situatën. Ai nuk i përjashton pakënaqësitë e qytetarëve, por duke kritikuar kolegët e tij nga opozita, thotë se kanë qenë politikat opozitare të AAK-së ato që e kanë dhënë efektin teksa të tjerët u vonuan.

“Fatkeqësisht gjatë gjithë këtyre kohëve, Aleanca ka qenë më e zëshmja në opozitarizëm. Me kohë i ka vërejtur problemet që ka qeverisja. Të tjerët kanë qenë disi më të heshtur dhe më të vonuar. Besoj se kjo është një arsye e nisjes së një trendi në rritje të Aleancës”, është shprehur Nitaj.

Reformat e brendshme

Për Selmanajn, faktori tjetër që ka ndikuar në rritjen e partisë më të vjetër në Kosovë, është reforma që është kryer gjatë qëndrimit në opozitë, nën udhëheqjen e Lumir Abdixhikut.

“LDK-ja ka bërë veprime drastike duke ndërruar kryetarin e saj menjëherë pas zgjedhjeve. Duhet investim më i madh në kohezionin e brendshëm, investim në prurjet e reja që njerëzit ta kenë atë pasqyrën e qartë që LDK-ja është e gatshme të marr përgjegjësi për të udhëhequr me vendin”, tha ai.

Abdullahu, theksin e vë në vizionin e ri të partisë dhe të Kryetarit të saj, Memli Krasniqi.

“Përtej sondazheve, PDK-ja është e fokusuar në ndërtimin e vizionit të ri qeverisës. Qytetarët e Kosovës tashmë kanë filluar të mbështesin njerëzit kompetentë e me vizion për të ardhmen. Ky është edhe përkushtimi ynë dhe i kryetarit Memli Krasniqi që të ndërtojmë një vizion të ri e zhvillimor për vendin, për ta ndalur këtë stagnim që e ka shkaktuar qeverisja aktuale”, ka deklaruar ai.

Edhe Nitaj, sikurse kolegët e tij opozitarë, ndër faktorët e paktë që kanë ndikur në rritje, është procesi i konsolidimit të brendshëm të partisë.

“Mos harroni se Aleanca ka përfunduar edhe një proces shumë të suksesshëm të zgjedhjeve të brendshme para pak muajsh, që po ashtu mund të jetë një tjetër arsye për rritje. Grupi parlamentar i AAK-së ka pasur një përformancë të mirë”.

Pushteti lokal

Deputeti i LDK-së, si arsye tjetër që kjo parti doli më mirë në sondazhe, është edhe rezultati i zgjedhjeve në nivel lokal në nëntor të vitit 2021, menjëherë pas zgjedhjeve të përgjithshme ku kishte pësuar humbjen më të madhe në historinë e saj.

“Në bazë të të dhënave që i ka, LDK-ja është partia e dytë në Kosovë dhe jemi në numrat që kemi qenë në zgjedhjet para 14 shkurtit, e cila u reflektua edhe në zgjedhjet lokale. Trendi është jashtëzakonisht pozitiv dhe LDK-ja ka shumë mundësi që me angazhim më të madh të arrijë tek tridhjetë përqind”.

Pa dallime në sqarim, Abdullahu kujton përformacën e mirë të PDK-së në zgjedhjet lokale.

“PDK krahasuar me zgjedhjet e fundit ka shënuar rritje të vazhdueshme dhe konsolidim duke dalë e para në zgjedhjet lokale dhe duke fituar në qytetet më të mëdha të vendit. Qytetarët e Kosovës tashmë kanë filluar të mbështesin njerëzit kompetentë e me vizion për të ardhmen”.

“Me besimin e qytetarëve të Kosovës pa dallim, PDK do të dalë fituese e zgjedhjeve të ardhshme parlamentare dhe do të qeverisë me zyrtarët e saj kompetentë për ta zhvilluar vendin drejt të ardhmes”.

Vlerësimin e ngjashëm e jep edhe Nitaj, i cili thotë se qeverisja e mirë në komunat e udhëhequra nga AAK-ja ka bërë që kjo parti ta ruaj konsistencën e saj,

“E fundit por jo më pak e rëndësishme, është qeverisja e mrekullueshme e pesë komunave të udhëhequra nga Aleanca. Ato janë renditur në krye të transparencës dhe të përformancës qeverisëse në vend”.

Për dallim nga Selmanaj e Abdullahu, të cilët konstatuan se do të dalin fituese të zgjedhjeve të ardhshme, duke qenë i vetëdijshëm për forcën e partisë që përfaqëson, Nitaj potencoi se momentalisht AAK-ja nuk mendon për zgjedhje, përkundrazi, pavarësisht sondazheve, bëri të ditur se fokusi i tyre do të vihet mbi problemet me të cilat përballet vendi.