Si përdoren Facebook Messenger dhe Meta Pay për të blerë materiale të abuzimit seksual të fëmijëve

Kur policia në Pensilvani arrestoi 29-vjeçaren Jennifer Louise Whelan në nëntor 2022, e akuzuan për dhjetëra akuza për krime të rënda.

Ndër to përfshihej trafikimi seksual dhe sulmi i pahijshëm ndaj tre fëmijëve të vegjël.

Një muaj më parë, policia ka zbuluar se Whelan po përdorte tre fëmijë të moshës gjashtë vjeç, të gjithë nën kujdesin e saj, për të prodhuar materiale për abuzim seksual të fëmijëve.

Ajo dyshohet se i dërgonte video dhe foto një klienti përmes Facebook Messenger.

Blerësi i supozuar, Brandon Warren, u padit nga një trup gjykuese në shkurt 2022 dhe u akuzua për nëntë akuza të shpërndarjes së materialit që përshkruante të miturit të përfshirë në sjellje të qarta seksuale.

Dokumentet e gjykatës të para nga The Guardian citojnë mesazhe në Facebook mes të dyve, në të cilat Warren dyshohet se i përshkruan Whelan se si ai dëshiron që ajo t’i bëjë këto video.

Whelan mori pagesën për pamjet mbi Meta Pay, sistemin e pagesave, sipas kallëzimit penal kundër saj.

Meta Pay, i njohur si Facebook Pay përpara riemërtimit në vitin 2022, është një shërbim pagese që u mundëson përdoruesve të transferojnë para përmes rrjeteve sociale të kompanisë.

Përdoruesit ngarkojnë kartat e tyre të kreditit, kartat e debitit ose informacionin e llogarisë PayPal në Facebook Messenger ose Instagram për të dërguar dhe marrë para.

Një zëdhënës i Meta-s konfirmoi se kompania ka parë dhe raportuar pagesa nëpërmjet Meta Pay në Facebook Messenger që dyshohet se kanë lidhje me shfrytëzimin seksual të fëmijëve.

“Shfrytëzimi seksual i fëmijëve është një krim i tmerrshëm. Ne mbështesim zbatimin e ligjit në përpjekjet për të ndjekur penalisht këta kriminelë dhe investojmë në mjetet më të mira dhe ekipet e ekspertëve për të zbuluar dhe për t’iu përgjigjur aktiviteteve të dyshimta. Meta raporton të gjithë shfrytëzimin seksual të fëmijëve në dukje në NCMEC – Qendra Kombëtare e Fëmijëve të Zhdukur dhe të Shfrytëzuar – përfshirë rastet që përfshijnë transaksione pagesash”.

Moderatorët e platformën thonë sakaq se Meta nuk arrin të zbulojë pagesat për materialet e abuzimit të fëmijëve.

Nëpërmjet shqyrtimit të dokumenteve dhe intervistimit të ish-moderatorëve të përmbajtjes Meta, një hetim i The Guardian ka gjetur se pagesat për përmbajtjen e abuzimit seksual të fëmijëve që ndodhin në Meta Pay ndoshta po shkojnë të pazbuluara dhe të paraportuara nga kompania.

Dokumentet e gjykatës tregojnë se veprimet e Whelan dhe Warren nuk u vunë re nga Meta. Në vend të kësaj, Kik Messenger, një tjetër platformë sociale, raportoi se Warren kishte ngarkuar video të dyshuara si materiale abuzimi seksual të fëmijëve për t’i ndarë me përdoruesit e tjerë.

Çka shkaktoi një hetim policor në Virxhinian Perëndimore, ku jeton Warren.

Pajisjet e tij elektronike u sekuestruan dhe policia më pas zbuloi tetë video dhe pesë imazhe që ai dyshohet se kishte blerë nga Whelan përmes Facebook Messenger.

Dy ish-moderatorë të përmbajtjes së Meta-s, të punësuar midis viteve 2019 dhe 2022, i thanë The Guardian se panë transaksione të dyshimta që po ndodhnin nëpërmjet Meta Pay që ata besonin se kishin lidhje me trafikimin e fëmijëve, por ata nuk ishin në gjendje të komunikonin me ekipet e pajtueshmërisë me Meta Pay.

Pagesat zakonisht janë vetëm disa qindra dollarë ose më pak në rastet e rishikuara nga The Guardian.

Sipas ish-analistit të pajtueshmërisë Meta, transaksionet e shumave kaq të vogla nuk ka gjasa të raportohen për shqyrtim nga sistemet e Meta-s.

Kjo do të thotë se pagesat e lidhura me aktivitetet e paligjshme ndoshta po bëhen të pazbuluara, kanë thënë ekspertët e krimeve financiare.

Meta ka një ekip prej rreth 15 mijë moderatorësh dhe analistësh të pajtueshmërisë, të cilët kanë për detyrë të monitorojnë platformat për përmbajtje të dëmshme dhe të paligjshme.

Sjelljet e mundshme kriminale supozohet se do të përshkallëzohen nga Meta dhe do të raportohen në forcat e rendit.

Rregulloret kundër pastrimit të parave kërkojnë gjithashtu që bizneset e shërbimit të parave të trajnojnë stafin e tyre të pajtueshmërisë për të pasur akses në informacion të mjaftueshëm për të qenë në gjendje të zbulojnë kur ndodh financimi i paligjshëm.

Megjithatë, kontraktorët që monitorojnë aktivitetin e transaksionit Meta Pay nuk marrin trajnime specifike për zbulimin dhe raportimin e flukseve të parave që mund të lidhen me trafikimin e qenieve njerëzore, duke përfshirë gjuhën, fjalët e koduara dhe zhargonin që përdorin zakonisht trafikantët, tha një ish-analist i pajtueshmërisë me pagesat në Meta Pay.

Por një zëdhënës i Meta-s i ka kundërshtuar pretendimet e analistit të pajtueshmërisë së pagesave.

“Analistët e pajtueshmërisë marrin trajnime fillestare dhe të vazhdueshme se si të zbulojnë aktivitete potencialisht të dyshimta – që përfshin shenja të trafikimit të mundshëm të qenieve njerëzore dhe shfrytëzimit seksual të fëmijëve. Programi ynë përditësohet rregullisht për të pasqyruar udhëzimet më të fundit nga rregullatorët e krimit financiar dhe ekspertët e sigurisë”.

Edhe në të kaluarën platformat e Meta-s kanë qenë të lidhura me shfrytëzimin e dyshuar të fëmijëve.

Si një biznes shërbimesh parash, Meta Pay i nënshtrohet rregulloreve bankare të SHBA-ve kundër pastrimit të parave, të cilat kërkojnë që bizneset të raportojnë financimin e paligjshëm në Rrjetin e Zbatimit të Krimeve Financiare (FinCEN) të departamentit të thesarit të SHBA-ve.

Nëse Meta nuk arrin të zbulojë dhe raportojë këto pagesa, mund të jetë në kundërshtim me ligjet e SHBA-ve kundër pastrimit të parave, thonë ekspertët e krimeve financiare.

Edhe aplikacionet e tjera të pagesave janë përballur me shqyrtimin e praktikave të tyre në parandalimin e aktivitetit të paligjshëm.

Ndërkaq, ish-moderatorë të tjerë të përmbajtjes të intervistuar nga The Guardian i krahasuan punët e tyre me punën në qendrën e thirrjeve ose në fabrikë.

Puna e tyre përfshinte rishikimin e përmbajtjeve të shënuara si të dyshimta nga përdoruesit dhe software-in e inteligjencës artificiale dhe marrjen e vendimeve të shpejta nëse do të shpërfillnin, hiqnin ose përshkallëzonin përmbajtjen në Meta përmes një programi software-ësh.

Ata kanë treguar se nuk mund të komunikonin me analistët e pajtueshmërisë me Meta Pay për transaksione të dyshimta që ata panë.

“Nuk na lejohej të kontaktonim punonjësit e Facebook apo ekipe të tjera. Menaxherët tanë nuk na thanë pse ndodhte kjo”.

Gretchen Peters, e cila është drejtoresha ekzekutive e Aleancës për Kundër Krimit Online, ka dokumentuar shitjen e lëndëve narkotike, përfshirë fentanilin, në platformat e Meta-s.

Po ashtu ajo ka intervistuar moderatorë të Meta-s, të cilët nuk u lejuan të komunikonin me ekipet e tjera në kompani.

Ajo ka thënë se kjo mbyllje ishte një shkelje e madhe e rregulloreve bankare.

“Ne kemi dëgjuar nga moderatorët në Meta se ata mund të shohin se po ndodh sjellje e paligjshme dhe se ka transaksione të njëkohshme përmes Meta Pay, por ata nuk kanë asnjë mënyrë për të komunikuar atë që po shohin nga brenda me moderatorët në Meta Pay”, ka treguar Peters.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.