Ragmi Mustafi, këshilltar i Zëvendëskryeministrit të Kosovës, Besnik Bislimi, për Luginën e Preshevës, ka thënë se shumë vetura me traga RKS po shihen në rrugët e Luginës.
Këto komente, ish-kryetari i Këshillit Kombëtar në Serbi (KKSH), i ka bërë pasi që Kosova dhe Serbia ia kanë njohur njëra tjetrës targat shtetërore, duke i dhënë fund kështu regjimit të stikersave.
“Këmbëngulje, vendosmëri, reciprocitet… dhe një dashuri që s’kufizohet nga kufijtë!”, shkroi Mustafi në Facebook.
Ajo që bëhet më e bukur, sipas tij, është kur Kosova shfaqet në çdo skaj të Luginës.
“Më shumë Kosovë në Luginë!”, përfundoi ai.
Më 4 janar, Qeveria e Kosovës, vendosi për heqjen e letrave ngjitëse mbi targat e Serbisë, gjatë qarkullimit të tyre në territorin e Kosovës. Po ashtu edhe automjetet me targa RKS, që nga 1 janari, qarkullojnë pa letra ngjitëse në territorin e Serbisë, me vendimin e qeverisë së saj.
Kosova dhe Serbia kishin arritur marrëveshjen për targat në vitin 2011. Por, ajo nuk ishte zbatuar. Në vitin 2021, çështja e targave nxiti tensione në Veri, tensione të cilat u përshkallëzuan në dy vjetet pasuese. Konvertimi i targave në shumë raste kishte dërguar edhe në djegien e makinave.
Largohet regjimi i stikersave, Kosova dhe Serbia ia njohin targat njëra tjetrës
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com