Një sëmundje e rrezikshme dhe misterioze vazhdon të përhapet mes fëmijëve. Bashkë me të edhe pyetjet se çfarë e shkakton, pa përjashtuar lidhjet e mundshme me COVID-in.
Për ekspertët, është shumë herët për të treguar se çfarë fshihet pas rasteve.
Mbi 600 raste të hepatitit, pa ndonjë shkak të njohur, janë identifikuar në mbarë botën që nga tetori i vitit 2021. Shumë prej rasteve përfshijnë fëmijë që kanë qenë të shëndetshëm.
Numrin më të madh të rasteve të identifikuara e ka Mbretëria e Bashkuar, 197. Kurse Shtetet e Bashkuara të Amerikës numërojnë 180 raste, shumica e të cilave kanë qenë mjaft të rënda.
Paçka se rastet shtohen, shkaku mbetet ende një mister mjekësor.
“Fusha e lojës po ndryshon çdo orë”, ka treguar Jason Kindrachuk, profesor asistent i mikrobiologjisë mjekësore dhe sëmundjeve infektive.
“Inç pas inçi, po fillojmë të kuptojmë se cili është ky problem. Por nuk mendoj se i kemi ende të gjitha ato pjesë të enigmës për të thënë se kjo është ajo çka mendojmë se po ndodh”, ka thënë ai.
Teksa inflamacioni i lehtë i mëlçisë nuk është i pazakontë te fëmijët, inflamacion i rëndë si ky është.
Mbretëria e Bashkuar ka tetë deri në dhjetë transplante të mëlçisë çdo vit, por tashmë i ka kaluar këto shifra, me 11 në vetëm tre muaj.
Në nivel global, 26 pacientë kanë kërkuar transplantim të mëlçisë. Gati gjysma e vdekjeve kanë ndodhur në SHBA, megjithëse vendi përbën vetëm një të tretën e rasteve të identifikuara.
Rastet e para në SHBA u raportuan në Alabama. Pastaj, u gjetën në 36 shtete dhe territore.
Testet e gjakut zbulojnë se inflamacioni i rëndë i mëlçisë nuk shkaktohet nga fajtorët e zakonshëm, duke përfshirë viruset e hepatitit A, B, C, D dhe E.
Janë duke u hetuar disa shkaqe të mundshme.
Çka mund të jetë një virus i ri që ende nuk është identifikuar. Ose mund të jetë një virus ekzistues, ose viruse ekzistuese të grupuara së bashku, duke shkaktuar simptoma të reja.
Një nga viruset kryesore në shqyrtim është adenovirusi, një familje e zakonshme virusesh që zbulohen në qarkullimin e gjakut të shumë pacientëve.
Zakonisht, ai shfaqet si një bakter në stomak.
Por indet e mëlçisë, të cilat janë ekzaminuar deri më tani, nuk tregojnë shenja të adenovirusit dhe është e pazakontë që ky virus të shkaktojë hepatit.
Po ashtu nuk mund të jetë çudi të zbulohen efekte të rralla nga viruset e zakonshme.
Një tjetër shkak mund të jenë efektet afatgjata nga Sars-Cov-2. Në disa raste, fëmijët me hepatit rezultuan pozitivë, por në të tjera nuk kishte histori të dokumentuar të COVID-it.
Infektimet me COVID kanë qenë të përhapura te fëmijët dhe shumë prej pacientëve janë shumë të vegjël për t’u vaksinuar.
Tashmë ka lidhje mes COVID-it dhe problemeve të mëlçisë. Probleme të funksionimit të mëlçisë janë dokumentuar te fëmijët dhe të rriturit gjatë gjithë pandemisë.
Madje, studiuesit italianë kanë ngritur alarmin për një lidhje të mundshme të COVID-it me hepatitin në maj 2021, pasi panë një djalë 10-vjeçar me probleme të mëlçisë.
Edhe ata brazilianë e kanë dokumentuar hepatitin e shkaktuar nga COVID-i në një fëmijë në shtator 2021.
Gjithashtu sindroma inflamatore multisistemike te fëmijët (MIS-C), një sindromë e rrezikshme inflamatore e lidhur me COVID-in, mund të dëmtojë mëlçinë.
Hepatiti akut është një shenjë kryesore e MIS-C, kanë zbuluar studiuesit në gusht 2020.
Sakaq, studiuesit indianë kanë nxjerrë një studim paraprak, i cili nuk është rishikuar ende nga kolegët, duke theksuar një rritje të rasteve të hepatitit pediatrikë pas rasteve asimptomatike të COVID-it.
Nga 475 fëmijë që rezultuan pozitivë, 37 kishin simptoma të hepatitit dhe u shëruan me trajtim.
Një tjetër studim i ri ka krahasuar funksionin e mëlçisë së mijëra fëmijëve që rezultuan pozitivë me fëmijë që kishin sëmundje të tjera të frymëmarrjes.
“Fëmijët me COVID-19 kanë një rrezik dukshëm më të lartë të funksionit jonormal të mëlçisë”, ka pohuar Rong Xu, profesoreshë e informatikës biomjekësore dhe bashkautore e studimit.
Sipas saj, këto çështje vazhduan për të paktën gjashtë muaj.
Por kjo nuk do të thotë që hepatiti, që shihet tani, është i lidhur me COVID-in. Mund të jetë fakti që sistemi imunitar i dobësuar, i goditur nga COVID-i ose viruse të tjera, i bën fëmijët më të ndjeshëm ndaj hepatitit.
Marrë nga “The Guardian”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
