Shtirej si pacient dhe vidhte sende të personave që shkonin për mjekim në QSUT, arrestohet nga Policia

Në prangat e policisë ka rënë një 38-vjeçar, i cili shtirej si pacient në QSUT dhe vidhte sende të personave që shkonin për mjekim në spital.

Arrestimi i tij u bë në flagrancë teksa po vidhte një shumë parash në automjetin në pronësi të shtetasit R. Rr., në ambientet e spitalit QSUT, i cili kishte shkuar për vizitë mjekësore.

Shtetasi i arrestuar nga Policia e Tiranës është 38-vjeçari me iniciale A. Gj., i dënuar edhe më parë për të njëjtën vepër penale, atë të “Vjedhjes”.

Nga tërësia e veprimeve hetimore të kryera, dyshohet se shtetasi A. Gj. është autor i disa rasteve të vjedhjeve të ndryshme, të ndodhura kohët e fundit, në ambientet e QSUT-së dhe në rrugën e Dibrës.

Policia po vijon punën për dokumentimin e vjedhjeve të tjera që mund të jenë kryer nga ky shtetas.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.