Shtëpia e së vërtetës

Njëmijë e njëqind dje.

Njëmijë e njëqind e një sot.

Në shifra dallimi është pothuaj i pashquajtshëm. Në gjithçka tjetër, ai është qëllimi.

Shqipëria dhe Kosova nuk kanë mungesë mediash. Aq më pak portalesh. Njëmijë e njëqind janë të regjistruara para nesh.

Në mos janë shumë, janë mjaftueshëm.

Një në katër shqiptarë iu beson atyre mediave. Për tre të tjerët, mungon diçka. Duket e panatyrshme dhe tingëllon e pavërtetë.

E vërteta. Shtëpia e së vërtetës. Një thirrje, si kërkesë, që kthehet në mision.

Ai është udhërrëfyesi jonë, në dhënien e informacionit dhe lajmeve brenda një mjedisi medial vazhdimisht në ndryshim.

Në këtë frymë, ne u shërbejmë lexuesve dhe shoqërisë.

Shoqërive shqiptare të së sotmes në veçanti. Dhe, shoqërisë shqiptare të së nesërmes në plotni.

Ne ndodhemi në ndërtesën e re të stadiumit kombëtar të Tiranës, “Air Albania”, në zemër të kryeqytetit.

Ambientet janë të vendosura në katin e pestë të ndërtesës, i cili është edhe niveli i fundit i saj. Ajo ka një formë harkore, që ka intensifikuar sfidën e organizimit të ambjenteve funksionale.

AP-ja përbëhet nga pesë pjesë kryesore, administrata, redaksia, departamenti teknik, hapësira e përbashkët, dhe instituti. Sipërfaqa totale është 1,057 m².

Administrata është pozicionuar në hyrje të katit dhe vendodhja qendrore bën që ky departament të ketë lidhje me të gjithë departamentet e tjera të AP-së. Ajo është projektuar të akomodojë 15 punonjës.

Redaksia është parësore në AP, pasi në të kryhen aktivitetet kryesore. E ndarë në dy pjesë, zyrat e redaksisë dhe zyrat e hapura-lounge, është projektuar të akomodojë 28 punonjës me mundësi rritjeje në vazhdim.

Departamenti teknik është në shërbim të 21-30 punonjësve. Ai është i ndarë në dy pjesë, Departamenti IT-së dhe Departamenti i Multimedias. Një rëndësi e veçantë i është kushtuar studios së xhirimeve televizive e cila është brenda standarteve bashkëkohore.

Hapësirat e përbashkëta janë projektuar për t’i shërbyer të gjithë punonjësve të AP-së. Këtu bën pjesë kafeneja, zona e pritjes dhe hapsira e shërbimit të mirmbajtjes së ambjenteve.

Instituti është departamenti që do të merret kryesisht me hulumtime dhe analiza të ngjarjeve, por që më vonë mund të ofrojë shërbime për palët e treta.

Ajo që bie menjëherë në sy kur viziton ambientet, është ndriçimi natyror i cili ka jo vetem efekt të këndshëm vizual, por krijon edhe një komoditet në punë, për të bërë të mundur produktivitetin e punonjësve.

E gjithë pamja e Albanian Post, është një ndërthurje mes klasikes dhe modernes ku elementet e veçanta e bëjnë atë unike. Kjo nisur nga abazhurat në formë kazani, të cilat janë grupuar në pozicione të ndryshme të Albanian Post-it.

Ato simbolizojnë grupimet e gazetarëve mediokër që vëzhgojnë punën e profesionistëve. Idea është huazuar nga shprehja e Kryeministrit Edi Rama mbi “kazanin mediatik”.

“Muri informativ”, i cili është i gjithi i ndriçuar me dritë natyrale është dizajnuar me listela të keramikës. Secila prej tyre duke filluar nga dyshemeja dhe duke vazhduar e pandërprerë deri në lartësinë e tavanit.

Ka një simbol mjaft interesant pasi lidhet me informacionin në numër të madh që hyn në AP, dhe përsëritja e tyre simbolizon informacionin nga burime të ndryshme.

Informacionin që kthehet në lajm. Dhe, lajmin që për kriter ka të vërtetën.

Një shtëpi, për të vërtetën.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.