Shtëpia e Bardhë pyetet për Yuri Kim, Biden përgjigjet për Iranin

Në harkun e një muaji Administrata Biden ‘reflektoi’ mbi kërkesën për informacion të Albanian Post lidhur me procedurat e mundshme të zëvendësimit të ambasadores amerikane Yuri Kim.

Por, Shtëpia e Bardhë paraqiti në postën elektronike të gazetës në orët e para të 11 janarit një përgjigje sa konfuze aq edhe të habitshme.

Ndërsa nuk kishte asnjë koment për vijimësinë e punës së diplomates amerikane të atashuar në Tiranë prej vitit 2020, Biden me nënshkrimin e tij iu adresua letrës zyrtare me shqetësimin për shtypjen e protestave në Iran.

Kjo, duke u konfirmuar si “një makineri gafash e vetë-pranuar”, nën përshkrimin e përdorur shpeshherë nga multimediali “CNN”.

Letra e plotë:

“I nderuar zoti Hoxhaj,

Faleminderit që keni shkruar. Unë mbetem shumë i shqetësuar për shtypjen e dhunshme të protestuesve paqësorë në Iran dhe administrata ime qëndron me këta qytetarë të guximshëm – mes tyre gra dhe studentë – të cilët kërkojnë të drejta të barabarta dhe dinjitet bazë njerëzor.

Për dekada, regjimi i Iranit i ka mohuar liritë themelore popullit të tij dhe ka shtypur aspiratat e brezave të njëpasnjëshëm përmes frikësimit, shtrëngimit, dhunës dhe keqpërdorimit të teknologjive të tilla si mbyllja e internetit. Unë besoj se e ardhmja do të fitohet nga vendet që çlirojnë potencialin e plotë të popullatës së tyre – ku gratë dhe vajzat ushtrojnë të drejta të barabarta, minoritetet fetare dhe etnike mund të jetojnë jetën e tyre pa ngacmime dhe qytetarët mund të pyesin dhe kritikojnë liderët e tyre pa frikën e hakmarrjes .

Për këtë qëllim, ne po e bëjmë më të lehtë për iranianët qasjen në internet, duke përfshirë platformat dhe shërbimet e jashtme të sigurta. Shtetet e Bashkuara do të mbajnë përgjegjës zyrtarët iranianë dhe autorët përgjegjës për përdorimin e dhunës që synon të shtypë shoqërinë civile, duke përfshirë Policinë e Moralit. Dhe ne do të vazhdojmë të mbështesim të drejtën e iranianëve për të protestuar lirisht.

Faleminderit përsëri që më keni shkruar. Ndërsa qytetarët e Iranit frymëzojnë botën me trimërinë e tyre, ne do të vazhdojmë t’i mbajmë ata përgjegjës për ushtrimin e dhunës kundër demonstruesve paqësorë dhe të punojmë për të siguruar të drejtat universale të të gjithë njerëzve në mbarë botën.”

Ndërtimi i ngjarjes

Më 9 dhjetor, Departamenti Amerikan i Shtetit (DASH) iu kundërpërgjigj me shumë diplomaci Ministrisë për Evropën dhe Punët e Jashtme në Shqipëri (MEPJ), e cila njoftoi nisjen e procedurës për zëvendësimin e ambasadores amerikane.

Në një përgjigje të shkurtër për Albanian Post, zëdhënësi i DASH-it vërente se procesi i nominimit i takon vetëm Shtëpisë së Bardhë.

“Ambasadorët e SHBA-ve përzgjidhen dhe shërbejnë sipas dëshirës së Presidentit të Shteteve të Bashkuara”, theksonte departamenti.

Shtëpia e Bardhë nuk do t’i përgjigjej menjëherë kërkesës për koment nga Albanian Post.

“Në përgjigje të interesimeve të medias gjatë gjithë ditës dhe për të shmangur çdo spekulim mbi ‘heshtjen’ e MEPJ-së, konfirmojmë se procedura e zëvendësimit të ambasadores Kim ka nisur zyrtarisht”.

Ky ishte njoftimi zyrtar i 8 dhjetorit që e nxorri tërësisht institucionin e diplomacisë shqiptare nga korniza e kompetencave të saj.

Jo pak reagime erdhën nga figura të ndryshme të politikës dhe diplomacisë, të cilët e evidentuan rastin si një “skandal diplomatik”.

Historiku

Gjatë dekadave të fundit, rreth 30 për qind e të gjithë ambasadorëve kanë qenë të emëruar “politikë”, sipas informacionit nga Shoqata Amerikane e Shërbimit të Jashtëm.

70 për qind e tjerë ishin diplomatë karriere, të cilët kaluan në shërbimin e jashtëm.

Edhe pse shumë të emëruar politikë mund të zgjidhen për shkak të përshtatshmërisë së tyre për vendin e punës, ekziston gjithashtu një traditë e diskutueshme, por e gjatë e dhënies së ambasadorëve edhe për donatorët e fushatës ose grupuesit.

Presidenti Richard M. Nixon mund të dëgjohet duke i thënë shefit të stafit të Shtëpisë së Bardhë, në një regjistrim të vitit 1971 të publikuar dekada më vonë si pjesë e “Nixon Tapes”, se “kushdo që dëshiron të jetë ambasador duhet të japë të paktën 250 mijë dollarë”.

Ndonjëherë këta të emëruar nuk duken domosdoshmërisht të kualifikuar për këtë punë.

Kur ish-presidenti Barack Obama emëroi manjatin e hotelerisë dhe grupin e fushatës George Tsunis për t’u bërë ambasador i SHBA-ve në Norvegji në 2014, ai u kritikua publikisht për mungesën e njohurive për vendin e tij nga Senatori Republikan John McCain.

Përpjekja e Tsunis për t’u bërë ambasador në Norvegji përfundimisht dështoi, por shumica e të nominuarve politikë ia dalin mbanë.

Shumë performojnë pa incidente gjatë disa viteve të tyre në punë, por disa jo.

Cynthia Stroum, e cila shërbeu si ambasadore amerikane në Luksemburg midis viteve 2009 dhe 2011, pasi ishte një donator i madh i Obama-s, u akuzua më vonë nga zyrtarë nga Zyra e Inspektorit të Përgjithshëm të Departamentit të Shtetit se i solli “elementët kryesorë të Ambasadës së Luksemburgut në një gjendje mosfunksionimi” me konfrontimin e saj dhe stilin e menaxhimit, mes problemeve të tjera.

Ndërsa Departamenti i Shtetit ka një proces për zgjedhjen e diplomatëve të tij të karrierës për të zënë vendet e ambasadorit, kritikët pretendojnë se procesi për të emëruarit politikë është i errët.

Ka disa kufizime për emërimet politike për poste ambasadore.

Komiteti i Senatit për Marrëdhëniet me Jashtë mund të refuzojë të konfirmojë një kandidat, ose vendi marrës mund ta refuzojë personin, por veprime të tilla janë të rralla.

Në teori, të paktën, diplomatët e karrierës që punojnë nën një ambasador të emëruar politikisht mund të kufizojnë çdo sjellje të papërshtatshme.

Yuri Kim

Yuri Kim mbërriti në Tiranë si Ambasadorja e Shteteve të Bashkuara të Amerikës në Republikën e Shqipërisë në janar 2020.

Ajo ka qenë drejtoreshë e Çështjeve të Europës Jugore dhe ka mbuluar Turqinë, Greqinë, Qipron dhe më gjerë rajonin e Mesdheut Lindor; si drejtoreshë e Zyrës së Çështjeve Europiane të Sigurisë dhe ato Politiko-Ushtarake, ka mbuluar NATO-n dhe Organizatën për Siguri dhe Bashkëpunim në Europë (OSBE).

Më parë ka qenë Shefe e Kabinetit e Zëvendës Sekretarit të Shtetit dhe drejtoreshë e Qendrës për Studimin e Administrimit të Diplomacisë.

Më herët në karrierën e saj, ka qenë Ndihmëse e Posaçme e Sekretarit të Shtetit Colin Powell, si dhe Ndihmëse e Posaçme e Ndihmës Sekretarit të Shtetit për Çështjet e Azisë Lindore dhe Paqësorit.

Mandatet e saj jashtë SHBA-ve përfshijnë Turqinë, Irakun, Republikën e Koresë, Japoninë dhe Kinën.

Yuri Kim ka një diplomë bachelor nga Universiteti i Pensilvanisë dhe një Master në Filozofi nga Universiteti i Kembrixhit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.