Shqiptarët në MV me ID në shqip

Shqiptarëve të Maqedonisë së Veriut do t’u jepet mundësia që t’i kenë kartat e tyre të identitetit në gjuhën shqipe.

Me fillimin e lëshimit të kartave të reja nën emrin e Maqedonisë së Veriut, për qytetarët shqiptarë në MV, ato do të plotësohen automatikisht në shqip.

Detajet shqip në kartë përfshijnë emrin dhe mbiemrin, gjininë, vendlindjen dhe kombësinë.

Përtej gjuhës shqipe, detajet do të jenë të vendosura edhe në gjuhën angleze.

E njëjta gjë do të vlejë edhe për maqedonasit, të cilët do t’i kenë të dhënat e tyre në maqedonisht dhe anglisht.

Ndërkohë që për shqiptarët do të jetë një proces automatik, për personat e tjerë të huaj që duan t’i kenë në gjuhë amtare të dhënat, duhet një kërkesë e veçantë. Kjo mund të vlejë edhe për qytetarët, gjuha amtare e të cilëve përdor shkronja jo latine.

Pas miratimit të pasaportave me shtetësinë e Maqedonisë së Veriut në vend të emërtimit, si Maqedoni, radha u kalohet kartave të identitetit tashmë.

Ky hap i Shkupit zyrtar, vjen si kuadër i detyrimit të vendosur në Marrëveshjen e Prespës. Në qershor 2018, ajo u firmos midis palës maqedonase dhe asaj greke.

Sipas marrëveshjes, të gjitha dokumentacionet maqedonase duhet të riemërtohen si pronësi e Maqedonisë së Veriut.

Fillimi i këtij procesi u jep tashmë kushtetutshmëri solide dokumenteve të identifikimit në MV.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.