Shqipëria siguron Pajisje të Mbrojtjes “CBRN”

Shqipëria, si një anëtare e NATO-s, tashmë ka siguruar Pajisje të Mbrojtjes kimike, biologjike, radiologjike dhe bërthamore “CBRN”.

Këtë e konfirmuan për Albanian Post, burime zyrtare pranë Ministrisë së Mbrotjes të premten e 22 tetorit.

Ministri i Mbrojtjes së Shqipërisë, Niko Peleshi, ka nisur një vizitë dyditore në Minesterialin e NATO-s.

Por, përveç kësaj, ministri shqiptar ka nënshkruar dhe bashkëpunimin mbi zhvillimin dhe menaxhimin e zbulimit të agjentëve kimikë, biologjikë e radiologjikë për identifikimin e tyre.

Sipas faqes zyrtare të NATO-s, në këtë nismë morën pjesë dhjetë aleatë: Shqipëria, Belgjika, Greqia, Hungaria, Italia, Letonia, Holanda, Spanja, Mbretëria e Bashkuar dhe Shtetet e Bashkuara.

Çfarë synon nënshkrimi i këtyre projekteve?

Projekti i Pajisjeve të Mbrojtjes “CBRN” synon të krijojë një kornizë për sigurimin e pajisjeve mbrojtëse individuale dhe sistemeve të mbrojtjes kolektive.

Pjesëmarrësit do të jenë në gjendje të pajisin forcat e tyre me pajisje mbrojtëse të teknologjisë moderne, të standardizuara në një mënyrë me kosto efektive.

Projekti i Zbulimit dhe Identifikimit “CBRN” do të nisë aktivitete individuale shumëkombëshe për zhvillimin dhe prokurimin e sistemeve të avancuara të zbulimit dhe identifikimit të këtyre agjentëve.

Kjo do të rrisë aftësinë e aleatëve për të zbuluar agjentët CBRN në një mënyrë të shpejtë dhe efektive. Si dhe rritjen e këtyre kapaciteteve, me qëllim për të përmbushur objektivat e kapaciteteve.

Te kjo e fundit u përfshinë nëntë aleatë: Shqipëria, Belgjika, Greqia, Italia, Letonia, Holanda, Polonia, Mbretëria e Bashkuar dhe Shtetet e Bashkuara.

Projektet janë pjesë e një portofoli në rritje të projekteve shumëkombëshe me Vizibilitet të Lartë të mbështetur nga NATO në përgjigje të sfidave kyçe të aftësisë për Aleancën.

Në këtë kontekst, cilëson burimi pranë Ministrisë, “bashkëpunimi shumëkombësh do të mbulojë një spektër të gjerë bashkëpunimi të ndryshëm, në të gjithë spektrin Doktrinar, të Organizimit, Trajnimit, Materialeve, Udhëheqjes, Personelit, Objekteve dhe Ndërveprimit dhe të zhvillohet në disa faza”.

Në përfundim thuhet se nga nënshkrimi i këtyre projekteve do të krijohet një Grup Specialistësh për Pajisjet Mbrojtëse të CBRN-së si forum i dedikuar për lehtësimin e diskutimeve dhe vendimmarrjeve shumëkombëshe.

Lufta në Afganistan dhe Irak

Gjatë takimit të ministrave të Mbrojtjes të vendeve anëtare të NATO-s, një çështje tjetër, që ishte në rend dite, kishte të bënte me luftën kundër terrorizmit në Afganistan dhe Irak.

“Aktualisht vendi ynë ka pranuar rreth 2 mijë qytetarë afganë dhe zotimi i Qeverisë shqiptare është të mirëpresë rreth 4 mijë afganë”.

Kjo ishte fjala që Peleshi mbajti në NATO, për sa u përket refugjatëve afganë që u larguan pas marrjes së kontrollit të Afganistanit nga talebanët.

Më tej, Pelshi theksoi faktin se, “pak javë më parë, Forcat shqiptare të Armatosura, dislokuan një kompani të Policisë Ushtarake, të cilët do të japin kontributin e tyre për ruajtjen dhe sigurinë e kampit ‘Bechtel’ në afërsi të Ferizajt – ku janë akomoduar refugjatët afganë të strehuar në Kosovë”.

Ministrat diskutuan mbi forcimin dhe modernizimin e Strukturës së Forcave të NATO-s, me qëllim përgatitjen e vendimeve që do të marrin udhëheqësit e NATO-s në Samitin e Madridit më 29-30 qershor 2022.

Ministrat ranë dakord për objektiva të rinj në rritjen e aftësisë ushtarake të secilit vend dhe një plan të përgjithshëm për mbrojtjen e zonës euro-atlantike.

Në përfundim të këtij takimi mbetet që strategjia e vendeve ka për qëllim “sigurimin e forcave të duhura në vendin e duhur, në kohën e duhur”.