Rritje informaliteti dhe shtim i korrupsionit në vend.
Këto janë dy prej përfundimeve në raportin e publikuar për vitet 2022-2023 prej Bankës Evropiane për Rindërtim dhe Zhvillim, të cilat reflektojnë edhe një rënie të indeksit të mirëqeverisjes në Shqipëri, krahasuar me vitin 2016.
Shtatë vjet më parë, ky indeks ishte i ndalur në 5.26 pikë dhe përgjatë këtij afati kohor, ka shkuar në 4.62 pikë.
Vetëm Bosnjë dhe Hercegovina, radhitet më keq, sa i përket vendeve të Ballkanit Perëndimor, teksa e radhitura më mirë është Mali i Zi, me 6.32 pikë.
Rënie Shqipëria, ka edhe krahasuar me një vit më parë në fushën e mirëqeverisjes, pavarësisht se me 0.09 pikë.
Por, si shqetësim i madh, në bazë të asaj çfarë shkruhet në raportin prej 126 faqesh të BERZH-it, janë informaliteti dhe korrupsioni.
Gjithashtu, edhe ecja shumë e ngadaltë me Reformën në Drejtësi, e cila nuk po shkon sipas parashikimeve të mëparshme.
Kjo e fundit, është edhe një prej aspekteve kyçe të integrimit evropian dhe procese si vetingu i gjykatësve, apo i dorëheqjes së gjyqtarëve vetë, ka krijuar lista të gjata çështjesh të patrajtuara në të gjitha rangjet.
Diçka kjo, e cila duhet zgjidhur.
E qëndrueshme për Tiranën është radhitja sa i përket implementimit të politikave të gjelbra, duke mos pasur asnjë ndryshim në gjashtë vite.
Ndërsa, lidhur me konkurrueshmërinë, shënohet një rritje e ndjeshme, krahasimisht me gjashtë vite më parë.
Edhe sa i përket aspekteve të integrimit apo ringritjes, shënohet rritje për Shqipërinë në indeks.
Megjithatë, mirëqeverisja në rënie është faktor vendimtar dhe përfaqësues, sa i përket shumë aspekteve si politikbërja lidhur me ekonominë, biznesin dhe investimet.
Lidhur me vendet e tjera të rajonit, Kosova ka një indeks veç 0.19 pikë më të lartë se Shqipëria, lidhur me mirëqeverisjen, i cili ndalet në 4.96 dhe tregon rritje të lehtë krahasuar me vitin 2016.
Maqedonia e Veriut shkon më pas në 5.47 pikë dhe Serbia, në 5.90.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
