Shqipëria dhe Kosova të veprojnë si një treg i përbashkët

Shqipëria dhe Kosova duhet të veprojnë si një treg i përbashkët është thënë në takimin mes Ministres për Mbrojtjen e Sipërmarrjeve në Shqipëri, Edona Bilali dhe delegacionit kosovar të Aleancës Kosovare të Bizneseve (AKB), të udhëhequr nga kryetari, Agim Shahini.

Ministrja Bilali ka thënë se me kënaqësi shteti shqiptar do të mbështes çdo iniciativë të sipërmarrësve të të dy vendeve në të mirë të rritjes së bashkëpunimit dhe promovimit të vlerave ekonomike kombëtare.

Ajo tutje ka deklaruar se janë të gatshëm të mbështesin çdo iniciativë që vjen nga bizneset andaj do të punojnë për rritjen e investimeve, prodhimeve, punësimeve dhe eksporteve të çdo produkti kualitativ e që ka synim tregun e brendshëm dhe të jashtëm.

Ndërsa kryetari i AK-së, Shahini ka thënë se dy qeveritë e Kosovës dhe Shqipërisë kanë nënshkruar dhjetëra marrëveshje bashkëpunimi ekonomiko-social në fusha të ndryshme për të avancuar bashkëpunim në mes sipërmarrësve në të dy anët por, sipas tij “mbetet ende shumë për të bërë në ngritjen e këtyre kapaciteteve për të rrit vetëdijen kombëtare për konsum të produkteve vendore”,  thuhet në postimin e AKB-së në rrjetin social Facebook.

Sipas Shahinit, “shkëmbimet tregtare të të dy shteteve tona janë drejt rritjes por duhet që shtetet të bëjë më shumë ashtu edhe bizneset të kenë bashkëpunim me konsumatorin që të joshin produkte dhe shërbime me cilësi më të lartë dhe të promovojnë besueshmëri më të madhe tek qytetarët”, andaj sipas tij vendet duhet të “veprojnë si një treg i përbashkët kundrejt konkurrencës së ashpër nga shtetet dhe korporatat e fuqishme të huaja”, thuhet në njoftim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.