Shpërthime në Kiev dhe Lviv

Kievi dhe Lvivi, pavarësisht tërheqjes së forcave ruse në fillim të muajit prill nga kryeqyteti ukrainas, janë zgjuar nën ethet e shpërthimeve të radhës.

Raportime për bombardime kanë ardhur nga dy kryebashkiakët e qyteteve kryesore, nëpërmjet kaneleve zyrtare të Telegram.

Fillimisht, ka qenë Vitali Klitschko, ai i cili denoncoi shpërthime në kryeqytet, mëngjesin e 16 prillit.

Zona e goditur sipas tij është ajo e Darnytskyi-t dhe rrethinat e tij.

Një bilanc paraprak prej shpërthimeve ende mungon. Ndërsa, ekipet e shpëtimit, gjenden në rajon për të parë vendin nga afër.

Guvernatori i Lviv-it nga ana tjetër, Maksym Kozytskyi, bëri me dije vetëm pak minuta pas Klitschkos, se qyteti perëndimor ishte goditur rreth orës 05:45 dhe 07:00, pa specifikuar zonat ku ka pasur dëmtime.

Sipas tij, sistemi kundërajror ukrainas është duke funksionuar, por nuk shpjegoi më tej se si po veprohet.

Mbi një bilanc paraprak viktimash, sërish nuk ka të dhëna. Teksa, ekipet e shpëtimit, ndodhen në vendngjarje edhe në Lviv.

Bombardimet ruse janë bërë tashmë një rutinë edhe në qytete në perëndim të Ukrainës.

Ndërsa, shqetësimi më i madh, mbetet ai në lindje, mbi të gjitha në qytetin e Mariupolit. Ky i fundit vijon të mbetet i rrethuar nga trupat ruse dhe në krizë të thellë humanitare.

Masakra si ajo në Bucha, kanë ngjallur frikën se në Mariupol, mund të kemi të bëjmë me një numër akoma më të madh viktimash, ku parashikimet arrijnë deri në 5 mijë syresh.

Gjithsesi, ende këto pretendime mbeten për t’u verifikuar nga organizata ndërkombëtare të pavarura dhe media.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.