Lajme

Shoqëria civile kërkon që situata në Veri të zgjidhet me dialog


Foto: Albanian Post.

Katër organizata të shoqërisë civile kanë reaguar rreth situatës në Veri të Kosovës, për të cilën kanë kërkuar që të zgjidhen mosmarrëveshjet përmes dialogut kurse situata të qetësohet.

Përmes një komunikate për media shoqëria civile ka kërkuar “stabilitet, paqe dhe siguri”.

“Të gjitha mosmarrëveshjet duhet të zgjidhen përmes dialogut, përderisa dhuna dhe veprimet e njëanshme duhet të ndërpriten menjëherë. Ne besojmë se promovimi dhe mbrojtja e paqes dhe të drejtave të njeriut për të gjithë qytetarët, e sidomos për grupet e margjinalizuara në Kosovë, nuk kanë alternativë dhe duhet të jenë gjithmonë prioritet i çdo procesi vendimmarrës”.

“Dhuna ndaj qytetarëve, autoriteteve publike, pjesëtarëve të forcave ndërkombëtare të sigurisë si dhe mediave është shkelje e rëndë e të drejtave të njeriut, rendit dhe sigurisë në Kosovë, dhe për më shumë e pengon procesin e paqes dhe pajtimit”, thuhet në komunikatën për media.

Foto: REL.

Po ashtu, ata kanë kërkuar që stabiliteti, paqja dhe siguria në veriun e Kosovës të jenë udhërrëfyesi kryesor për të gjitha palët e përfshira.

“Nga puna jonë në terren me qytetarët e komunitetit serb dhe të gjitha komuniteteve tjera që jetojnë në Kosovë, po e vërejmë ndikimin negativ të veprimeve të papërgjegjshme të akterëve shtetëror si në Prishtinë ashtu edhe në Beograd, duke ndikuar drejtpërdrejt në marrëdhëniet më të gjera ndëretnike në Kosovë”.

Sipas tyre, “pasojat e veprimeve të ndërmarra në veri të Kosovës prekin të gjithë qytetarët e Kosovës, prandaj situata duhet të trajtohet në mënyrë paqësore, të kujdesshme dhe të qetë”.

Ndërsa thirrja e tyre për Qeverinë dhe përfaqësues serbë në Kosovë ka qenë që të ndërpresin veprime të njëanshme dhe të bëjnë kompromiset e duhura për të tejkaluara gjendjen e krijuar në Veri të Kosovës.

Por që kjo të bëhet në koordinim të plotë me komunitetin ndërkombëtarë dhe palët e tjera duke u fokusuar ne dialogun në mes të Kosovës dhe Serbisë.

“Paqja dhe siguria janë gjithmonë zgjidhja dhe institucionet në Kosovë duhet të punojnë menjëherë drejt uljes së tensionit në veri dhe arritjes së një zgjidhje e cila do të ndihmonte në integrimin më të madh të komunitetit serb në Kosovë”.

Dita e katërt që serbët po protestojnë në Veri

Është dita e katërt me radhë që serbët në Zveçan, Leposaviq dhe Zubin Potok po protestojnë, duke kundërshtuar kryetarët e rinj shqiptarë.

Më 26 maj, tensionet në Veri u rritën, atëherë kur krerët e rinj të Zveçanit, Leposaviqit dhe Zubin Potokut, kishin hyrë nën përcjelljen e policisë në ndërtesat komunale.

Ndërkaq, më 29 maj, protestuesit u përleshën me trupat e misionit paqeruajtës të NATO-s në Kosovë, KFOR.

Nga kjo përleshje 41 trupa të KFOR-it u lënduan dhe dhjetëra protestues.

Ambasadorët e Shteteve të Bashkuara të Amerikës e Britanisë së Madhe kanë kërkuar që të ndalet menjëherë dhuna ndaj pjesëtarëve të KFOR-it.

Kryetarët e rinj shqiptarë u zgjodhën në zgjedhjet e parakohshme të 23 prillit.

Këto zgjedhje u mbajtën pas dorëheqjes së kryetarëve të mëparshëm komunale nëntorin e 2022.

Kryetarët e mëparshëm vinin nga Lista Serbe partia kryesore e serbëve në Kosovë, e cila nuk mori pjesë në zgjedhje dhe procesi u bojkotua nga serbët lokalë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore