Presidenti i Bjellorusisë, Aleksandër Lukashenko, e ka pritur mjaft mirë largimin e zinxhirit amerikan të ushqimit të shpejtë McDonalds nga Bjellorusia.
“Faleminderit Zotit që po largohet”, u shpreh lideri autoritar gjatë një takimi me disa punëtorë të sektorit bujqësor dhe ushqimor.
“Ne duhet të bëjmë për veten tonë atë që bënte McDonald’s”, theksoi ai duke shtuar se edhe bjellorusët e kishin mësuar tashmë zanatin e gatimit.
“Ne gjithashtu dimë të presim bukën dhe të vendosim një copë mish brenda, të pjekim patate të skuqura dhe të bëjmë një sallatë”.
Ishte janari i vitit 1990 dhe McDonald’s po hapte restorantin e tij të parë në Bashkimin Sovjetik, duke u bërë një nga kompanitë e pakta perëndimore që depërtoi “Perden e Hekurt” në ditët e tij të fundit, ndërsa ajo u hap ngadalë me botën.
Madje, ardhja e McDonald’s në BRSS kishte nxitur një teori të re politike.
Teoria e Harkut të Artë pohonte se dy vende që kanë McDonald’s nuk do të shkojnë në luftë, sepse prania e këtij restoranti është një tregues i nivelit të ndërvarësisë së vendeve dhe përputhshmërisë së tyre me ligjet e Shteteve të Bashkuara të Amerikës.
Megjithatë, nga 22 nëntori, McDonald’s do të operojë në Bjellorusi me emrin “Tasty point”, që është emri i zinxhirit rus që mori restorantet e kompanisë amerikane në Rusi.
Restorantet e para me këtë emër u hapën në Rusi më 12 qershor, duke zëvendësuar McDonald’s, i cili u largua nga vendi për shkak të pushtimit rus të Ukrainës më 24 shkurt.
Shumë brende të tjera të huaja janë larguar nga Rusia dhe Bjellorusia.
Kujtojmë se Bjellorusia është aleati i vetëm i Rusisë në këtë konflikt.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
