Shkaku i 1 mijë e 200 tonëve peshk në bregun japonez ende i panjohur

Në Japoni, zyrtarët kanë pranuar se po përpiqen të përcaktojnë pse qindra ton peshq kanë dalë në breg ditët e fundit.

Në fillim të këtij muaji, rreth 1 mijë e 200 ton sardele u gjetën duke lundruar në sipërfaqen e detit jashtë portit të peshkimit të Hakodate në Hokkaido.

Zyrtarët në Nakiri, një qytet në bregun e Paqësorit qindra milje në jug të Hokkaido-s, u përballën me 30 deri në 40 ton sardele japoneze me luspa, të cilat ishin vërejtur në zonë disa ditë më parë.

“Nuk kam parë kurrë diçka të tillë më parë”, ka treguar Mainichi Shimbun një peshkatar që ka punuar në zonë për 25 vjet.

“Vetëm vitin e kaluar filluam të kapnim sapa në Nakiri. Më bën të pyes veten nëse ekosistemi detar po ndryshon”.

Ekspertët kanë spekuluar se peshqit shtegtarë në të dyja zonat ishin bllokuar pasi ishin ndjekur deri në rraskapitje nga peshq të tjerë grabitqarë.

Ngjarjet e tilla mund të ndodhin gjithashtu kur ka rënie të papritur të temperaturës së ujit, duke bërë që peshqit të shkojnë në shok.

Por askush nuk ka qenë në gjendje të konfirmojë shkakun.

“Shkaku është i panjohur për momentin”, ka thënë Mikine Fujiwara, një zyrtar lokal i peshkimit.

“Ne planifikojmë të marrim mostra nga uji i detit në vend dhe ta ekzaminojmë atë për të zbuluar shkakun”,

Sakaq, një raport në gazetën britanike Daily Mail duket se e lidh fenomenin me çlirimin e ujit të trajtuar nga termocentrali bërthamor Fukushima Daiichi.

Raporti vë në dukje se peshqit e ngordhur kishin filluar të dilnin në breg pothuajse katër muaj pasi uzina filloi të shkarkonte ujin – i cili përmban sasi të vogla të izotopit radioaktiv tritium – në Paqësor.

Agjencia Ndërkombëtare e Energjisë Atomike miratoi planin, duke deklaruar në një rishikim të sigurisë se shkarkimi i ujit do të kishte “një ndikim të papërfillshëm radiologjik mbi njerëzit dhe mjedisin”.

Kina, e cila kundërshtoi lëshimin dhe vendosi një ndalim për ushqimet e detit japonez, është akuzuar për hipokrizi pasi vetë centralet e saj bërthamore pompojnë në mënyrë rutinore ujërat e zeza me nivele më të larta të tritiumit sesa ato që gjenden në shkarkimin e Fukushimës.

Imazhet janë shpërndarë gjerësisht në mediat sociale – shumë me teori konspirative të Fukushimës.

Ato kanë paralajmëruar se shkarkimi do të shkaktonte dëme të mëtejshme në reputacionin e prodhimeve të tyre të detit.

Ndërkohë, zyrtarët në Hakodate u kërkuan banorëve vendas që të mos konsumojnë peshkun e bllokuar mes raporteve se disa po mblidhnin sasi për të shitur ose ngrënë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.