Sherri në Trieste ishte përplasje brenda komunitetit kosovar

Agjencia italiane e lajmeve “ANSA”, ka rindërtuar motivet e sherrit që degjeneroi në të shtëna armësh, të shtunën e 4 shtatorit, në qendër të Triestes.

Sipas raportimeve të ANSA-s, nuk bëhet fjalë për një mosmarrëveshje midis kosovarëve dhe shqiptarëve, siç u raportua në fillim.

Konflikti ishte një grindje e brendshme në komunitetin e kosovarëve, në veçanti një përplasje mes dy familjeve. Kjo mësohet nga burime hetimore, thekson ANSA.

Njerëzit e përfshirë janë të gjithë midis moshës 20 dhe 40 vjeç dhe konsiderohen të integruar në mënyrë perfekte në strukturën shoqërore italiane. Shumica prej tyre janë punëtorë në sektorin e ndërtimit.

Sipas asaj që është mësuar nga burimet e ANSA-s, përplasja midis dy familjeve ka ardhur për shkak të një kontrate ndërtimi që njëra prej dy familjeve i ka vjedhur tjetrës.

Një arsye tjetër do të ishte ajo e një lidhjeje romantike që një vajzë e njërës prej familjeve ka me një anëtar të familjes tjetër.

Raportimet fillestare

Të shtënat u bënë jashtë një lokali të drejtuar nga kinezët në nyjën me rrugën “San Francesco”.

Pas një grindjeje fillestare, grupet, të përbërë nga njerëz të shumtë, gjithashtu u goditën dhe me objekte rrethanore.

Në ato momente, dikush prej tyre nxorri armën dhe qëlloi disa herë.

Policia dhe karabinierët mbërritën menjëherë në vendngjarje, sipas raportimeve të mediave.

Hetimet janë të koordinuara nga prokurorja në detyrë, Chiara De Grassi.

Fjala e dëshmitarëve

Për “Il Gazzetino” një nga dëshmitarët rrëfeu ngjarjen.

“Në një moment erdhi një furgon. Prej tij dolën më shumë njerëz dhe filluan të qëllonin”.

Në fillim, sipas tij, pati një përplasje me karrige dhe stola, të hedhura në ajër.

“Kam dëgjuar 5 deri në 7 të shtëna. Një person u shtri përtokë. E gjitha kjo gjë zgjati rreth dhjetë minuta”, thotë ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.