Shefja e Grupit Parlamentar të Lëvizjes Vetëvendosje, Mimoza Kusari-Lila, është kundër vendimit të partisë për të pasur kandidatë për zgjedhjet nacionale në Shqipëri.
Ajo kishte dhënë edhe një intervistë në një televizion në Shqipëri ku bënte të qarta dallimet në këtë pikë me Vetëvendosjen.
E pyetur nga Albanian Post për deklaratën e saj në ABC News, Kusari-Lila ka pohuar se është e vërtetë që “dallojmë në mendime”, sa i përket marrjes pjesë në zgjedhje atje, porse lajmin e mediumit të dhënë vetëm tre ditë para zgjedhjeve, e ka parë të nxjerrur nga kontekstit.
“Atë intervistë e kam dhënë para dhjetë ditësh, në vikendin e kaluar dhe kam thënë se dallojmë në mendime për atë. Por me dalë pak prej kontekstit, pak para zgjedhjeve në Shqipëri, po më duket e tepruar, të them të drejtën”, ka deklaruar Kusari-Lila, duke rikonfirmuar se “kam treguar dallimin në bindje”.
Kusari-Lila ka deklaruar edhe se intervistën e kishte bërë ditë më herët, por ajo “fatkeqësisht u publikua tani”.
“E udhës do të ishte të publikohej menjëherë, tjetër karakter do të kishte po të kishte dal para dy javësh. Intervista ka patur përmbajtje shumë të tjera, kjo ka qenë veç një bindje e imja që e kam shprehur. Nuk kisha dashtë të elaborohet tema më tutje, jo 3-4 ditë para zgjedhjeve në Shqipëri. Por, tash gjithçka është në moment të fundit e po i bie se tash unë e aktualizova këtë qëndrim timin në këtë moment”, pohoi Kusari-Lila.
Mimoza Kuari-Lila është kryetare e partisë Alternativa, por në zgjedhje ka garuar si pjesë e listës së Vetëvendosjes.
Në zgjedhjet e 25 prillit në Shqipëri Vetëvendosje do të garojë me tre kandidatë të pavarur – Boiken Abazin, Kreshnik Merxhanin dhe Iliaz Shehun.
/Albanianpost.com
