Me fillimin e dimrit të parë të plotë të luftës së Rusisë me Ukrainën, SHBA-ve po i mbarojnë disa sisteme armësh të teknologjisë së lartë dhe municione që mund të transferohen në Kiev.
Lajmi u bë i ditur nga multimediali amerikan “CNN”, duke cituar tre zyrtarë amerikanë të cilët janë të lidhur drejtpërdrejt me këtë çështje.
Tendosja mbi rezervat e armëve – dhe aftësia e bazës industriale amerikane për të përmbushur kërkesën – është një nga sfidat kryesore me të cilat përballet administrata Biden.
Kjo, ndërsa SHBA-të vazhdojnë të dërgojnë miliarda dollarë armë në Ukrainë për të mbështetur luftën e saj kundër Rusisë.
Stoqet e sistemeve të caktuara “po pakësohen” pas gati nëntë muajsh furnizime në Kiev gjatë luftës me intensitet të lartë dhe ka një “sasi të kufizuar” furnizimesh të tepërta që SHBA-të mund të dërgojnë, tha një zyrtar.
Ndër sistemet e armëve që shkaktojnë shqetësim të veçantë në lidhje me përshtatshmërinë e stokut të SHBA-ve ndaj nevojave të Ukrainës janë municione artilerie 155 mm dhe raketa anti-ajrore Stinger, thanë burimet.
Disa burime shprehën gjithashtu shqetësimin për prodhimin amerikan të sistemeve shtesë të armëve, duke përfshirë raketat kundër rrezatimit HARMs, raketat tokë-tokë GMLRS dhe raketat antitank portative Javelin – edhe pse SHBA-të kanë lëvizur për të rritur prodhimin e këtyre dhe sistemeve të tjera.
Për herë të parë në dy dekada, pas tërheqjes së trupave nga Afganistani dhe kalimit në një rol këshillues në Irak, Shtetet e Bashkuara nuk janë të përfshira drejtpërdrejt në konflikt.
Pa nevojën për të prodhuar armë dhe municione për luftë, SHBA-të nuk kanë prodhuar burime të mjaftueshme për të mbështetur një konflikt të zgjatur dhe me intensitet të lartë.
Përfaqësuesit e Departamentit të Mbrojtjes pretendojnë se kjo krizë nuk ndikon në gatishmërinë luftarake të vetë Shteteve të Bashkuara, pasi armët e dërguara në Ukrainë nuk vijnë nga ato që Shtetet e Bashkuara mbajnë për nevojat vetjake.
Kujtojmë se sekretari amerikan i Mbrojtjes Lloyd Austin njoftoi se të paktën gjashtë vende kanë njoftuar ndihmë të mëtejshme ushtarake për Ukrainën në takimin e shtatë të Grupit të Kontaktit të Mbrojtjes, i njohur si formati Ramstein, të mërkurën.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
