SHBA-të publikojnë Deklaratën për të Ardhmen e Internetit, nënshkruese Shqipëria dhe Kosova

Shtetet e Bashkuara dhe 60 vende partnere anembanë botës – përfshirë Shqipërinë dhe Kosovën – janë nënshkruese të një zotimi të ri.

Kjo e fundit synon ta mbajë internetin global të përballueshëm për të gjithë, të ketë një “rrjedhje të lirë informacioni” dhe të mbrojë të drejtat e njeriut.

Lajmin e bëri të ditur Shtëpia e Bardhë dhe Departamenti Amerikan i Shtetit përmes një njoftimi për shtyp.

Në vitin 2014, presidenti – asokohe – i SHBA-ve, Barack Obama donte që interneti të klasifikohej si një shërbim publik.

Kjo, veçanërisht për të mbrojtur neutralitetin e rrjetit, në mënyrë që të gjitha kompanitë të kenë akses të barabartë.

Më pas, në vitin 2017, FCC shfuqizoi neutralitetin neto.

Të enjten e 28 prillit, Shtëpia e Bardhë publikoi një deklaratë për të ardhmen e internetit.

“Interneti ka qenë revolucionar”, shkruan administrata Biden në një deklaratë.

Sipas autoriteteve amerikane, ai ofron mundësi të paprecedentë për njerëzit në mbarë botën për t’u lidhur dhe për t’u shprehur.

Interneti vazhdon të transformojë ekonominë globale, duke u mundësuar të ardhura miliarda njerëzve, nënvizon njoftimi zyrtar.

Deklarata

“Megjithatë ajo ka krijuar gjithashtu sfida serioze të politikave”, vazhdon deklarata. “Globalisht, ne jemi dëshmitarë të një trendi të rritjes së autoritarizmit digjital, ku disa shtete veprojnë për të shtypur lirinë e shprehjes, censurojnë faqet e pavarura të lajmeve, ndërhyjnë në zgjedhje, promovojnë dezinformimin dhe u mohojnë qytetarëve të tyre të drejta të tjera njerëzore”.

Për të luftuar këtë, ndajshtuar “miliona njerëzve të cilët ende përballen me barriera në akses” dhe se si “rreziqet dhe kërcënimet e sigurisë kibernetike minojnë besimin dhe besueshmërinë e rrjeteve”, SHBA ka krijuar “Deklaratën për të Ardhmen e Internetit”.

Në tekstin e tij të plotë prej rreth 2 mijë fjalësh, zotimi bën thirrje për një internet që është “i hapur, i lirë, global, i ndërveprueshëm, i besueshëm dhe i sigurt”.

Deklarata nuk përmban asnjë veprim specifik që duhet të ndërmerret nga SHBA-të ose ndonjë nga vendet partnere të saj, duke filluar nga Shqipëria e deri te Kosova.

Shtëpia e Bardhë thotë se është një angazhim politik për të “përparuar një vizion pozitiv për internetin dhe teknologjitë digjitale”, i cili “rimerr premtimin e internetit”.

“Në nënshkrimin e kësaj Deklarate, Shtetet e Bashkuara dhe partnerët do të punojnë së bashku për të promovuar këtë vizion dhe parimet e tij globalisht”, shton deklarata, “duke respektuar autonominë rregullatore të njëri-tjetrit brenda juridiksioneve tona dhe në përputhje me ligjet tona përkatëse të brendshme dhe detyrimet ligjore ndërkombëtare”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.