SHBA rrit normat e interesit, niveli më i lartë që nga viti 1994

Rezerva Federale e Shteteve të Bashkuara të Amerikës (FED) ka rritur normën bazë të huamarrjes me 0.75 pikë përqindjeje.

Masa vjen teksa FED kërkon të luftojë inflacionin në vend, i cili ka arritur nivele të larta që nuk janë parë për 40 vjet.

Vitin e kaluar, çmimet u rritën ndjeshëm.

Fillimisht, për shkak të problemeve të zinxhirit të furnizimit prej pandemisë së coronavirus-it dhe, më pas, për shkak të pushtimit rus të Ukrainës.

Përmes një deklarate, Komiteti Federal i Tregut të Hapur (FOMC) i përcaktimit të politikave të FED ka thënë se, pavarësisht rritjes së normës së interesit, mbetet i përkushtuar për kthimin e inflacionit në objektivin prej 2 për qind.

Që nga nëntori 1994, kjo është rritja më e madhe e normës së interesit të FED-it, me bankën qendrore të SHBA-ve që sinjalizon se pret të bëjë rritje të mëtejshme të normës bazë në të ardhmen.

Sipas FOMC-së, efektet e pushtimit rus të Ukrainës “po krijojnë presion shtesë në rritje mbi inflacionin dhe po rëndojnë aktivitetin ekonomik global”.

Po ashtu, bllokimet e vazhdueshme të COVID-19 në Kinë “ka të ngjarë të përkeqësojnë ndërprerjet e zinxhirit të furnizimit”.

Kryetari i FED-it, Jerome Powell, ka pranuar se rritja prej 0.75 pikë përqindjeje është “një rritje jashtëzakonisht e madhe”, pasi Banka Qendrore e SHBA-ve pritej të miratonte një rritje prej 0.5 pikë përqindjeje.

Powell, megjithëse priten rritje të mëtejshme të normës së interesit, nuk pret që rritje të mëdha, si ajo e shpallur, “të bëhen të zakonshme”.

Në SHBA, inflacioni i shfrenuar po ushtron presione të rënda mbi familjet, duke i detyruar ato të paguajnë shumë më tepër për ushqim, gaz dhe qira.

Ndërkohë, redukton aftësinë e tyre për të përballuar artikuj të lirë.

Njoftimi vjen mes rritjes së inflacionit dhe pasigurisë ekonomike në tregjet në mbarë botën.

Banka Qendrore Evropiane ka sinjalizuar planet për të rritur normat e interesit për herë të parë në 11 vjet duke filluar nga korriku.

Javën e kaluar, Banka Qendrore e Gjermanisë ka rritur parashikimin e saj të inflacionit për vitin 2022, pasi inflacioni në qark arriti normën e tij më të lartë në thuajse 50 vjet në maj, në 7.9 për qind.

Marrë nga “Deutsche Welle”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.