SHBA: Mike Pence i kërkon Gjykatës Supreme të rrëzojë të drejtat e abortit

Ish-zëvendëspresidenti i SHBA-ve, Mike Pence, i ka bërë thirrje Gjykatës së Lartë të rrëzojë çështjen historike të vitit 1973 “Roe v Wade” që legalizoi abortin.

Pence tha se vendimi ishte “i gabuar” dhe dëmtoi miliona foshnja të palindura. Nëse “Roe v Wade” anulohet, miliona gra do të humbnin aksesin në aborte.

Të mërkurën, Gjykata e Lartë dëgjoi argumentet mbi një ligj të Mississippi-t që ndalon abortin pas 15 javësh.

Ndalimi përfshin abortet në shtatzënitë e shkaktuara nga përdhunimi ose incesti.

Ligji, megjithatë, nuk është zbatuar për shkak të një sfide ligjore nga ofruesi i vetëm shtetëror i abortit.

Në një konferencë shtypi në Washington të martën, Pence tha se shpresonte se Gjykata e Lartë do të “bënte histori” me një ndryshim të plotë të “Roe v Wade”.

“Ne po i kërkojmë Gjykatës së Lartë të Shteteve të Bashkuara të rrëzojë ‘Roe v Wade’ dhe të rivendosë shenjtërinë e jetës njerëzore në qendër të ligjit amerikan”, tha ish-zëvendëspresidenti.

Për më tepër, Pence argumentoi se “trupi i gjyqtarëve të pazgjedhur” nuk reflekton opinionin popullor në SHBA.

Ai beson se zyrtarët e zgjedhur të nivelit shtetëror janë në gjendje më të mirë për të shkruar ligje për abortin për juridiksionet e tyre.

Një ndalim mbarëkombëtar i abortit nuk është në horizont, por shteteve mund t’u jepet kontroll mbi ligjet e tyre të abortit.

Sipas ekspertëve një lëvizje e tillë do të ishte “shkatërruese” për gratë me të ardhura të ulëta. Kjo do të rriste vdekshmërinë e nënave dhe varfërinë.

SHBA-të janë një nga shtatë vendet në botë që lejojnë abortet me zgjedhje pas javës së 20-të të shtatzënisë, sipas të përditshmes amerikane “Washington Post”.

“Amerika ka më shumë të përbashkëta me Kinën dhe Korenë e Veriut pasi lidhet me abortin sesa shumë prej aleatëve të saj evropianë”, tha Pence.

Prokurori i Përgjithshëm i Mississippi-t, Lynn Fitch, ka kërkuar vazhdimisht që “Roe v Wade” të rrëzohet. Në një përmbledhje verore të dorëzuar në gjykatë, Fitch tha se precedenti i vendimit është “jashtëzakonisht i gabuar”.

Ndërsa Pence pranoi se “nuk mund të thotë” se si do të vendosë gjykata, ai tha se ka “besim absolut se rryma ka ndryshuar për lëvizjen pro-jetës”.

“Amerikanët janë gati për t’i dhënë fund tiranisë gjyqësore të ‘Roe v Wade’”, shtoi ai.

Një vendim në favor të shtetit do të thotë se shtetet do të jenë në gjendje të zhvillojnë ligjet e tyre për abortin. Ekspertët besojnë se abortet së shpejti do të bëhen të paligjshme në më shumë se 20 shtete të tjera.

Një studim i “Pew Research” nga maji 2021 zbuloi se rreth gjashtë në dhjetë amerikanë besojnë se aborti duhet të jetë i ligjshëm në pothuajse të gjitha rrethanat. I njëjti sondazh zbuloi se katër në dhjetë amerikanë besojnë se duhet të jetë i paligjshëm në të gjitha rastet.

Në një deklaratë në fillim të këtij viti, Nancy Northrup, presidentja dhe CEO e Qendrës për të Drejtat Riprodhuese – e cila e ka sjellë çështjen në Gjykatën Supreme në emër të Organizatës së Shëndetit të Grave Jackson – tha se rasti i shtetit është “ekstrem dhe regresiv”.

“Qëllimi i tyre është që Gjykata e Lartë të heqë të drejtën tonë për të kontrolluar trupat tanë dhe të ardhmen tonë – jo vetëm në Mississippi, por kudo”, shtoi Northrup.

Vendimi i gjykatës pritet që të jepet në verën e vitit 2022.

Shtetet e Bashkuara janë një nga 198 vendet që lejojnë abortet me zgjedhje pas 20 javësh të shtatzënisë. Ndërsa në Texas ka hyrë në fuqi një ligj kufizues që ndalon të gjitha abortet në javën e gjashtë të shtatzanisë.

Gjithashtu ky ligj i jep të drejtën çdo individi të padisë këdo që është i përfshirë në sigurimin ose lehtësimin e një aborti pasi të zbulohet aktiviteti kardiak i fetusit.

Nga ana tjetë Presidenti amerikan Joe Biden ka dalë hapur kundër këtij ligji. 

Përmes një deklarate, Biden u zotua se administrata e tij do të veprojë për të “siguruar që gratë në Texas të kenë akses në aborte të sigurta dhe ligjore”.

Përveç Biden edhe Organizata e Kombeve të Bashkuara e ka dënuar ashpër ligjin e ri të abortit në Texas.

Sipas tyre, ky ligj u mohon të drejtat dhe kontrollin mbi trupin e tyre grave.