Shtetet e Bashkuara të Amerikës (SHBA) besojnë se Koreja e Veriut po teston një raketë të re balistike ndërkontinentale (ICBM), në atë që administrata Biden e quajti një “përshkallëzim serioz” që do të shkaktonte më shumë sanksione.

Pheniani kreu dy lëshime të fundit të raketave, për të cilat ka thënë se ishin të destinuara përfundimisht për vendosjen e satelitëve në hapësirë.

Pas shqyrtimit të tyre, megjithatë, inteligjenca amerikane ka vlerësuar se qëllimi i vërtetë ishte testimi i pjesëve të ICBM-së së re.

“Bazuar në analizën e këtyre lëshimeve, qeveria e Shteteve të Bashkuara ka arritur në përfundimin se këto lëshime përfshinin një sistem të ri ICBM që po zhvillon DPRK”, ka thënë John Kirby, zëdhënës i Pentagonit.

SHBA beson se ICBM që po testohet u shfaq fillimisht nga regjimi i Phenianit në paradën e Partisë së Punëtorëve më 10 tetor të vitit 2020, dhe më pas përsëri në një ekspozitë mbrojtëse një vit më vonë.

“Qëllimi i këtyre testeve, të cilat nuk demonstruan rrezen e ICBM-së, kishte të ngjarë të vlerësonte këtë sistem të ri përpara se të kryente një test në rreze të plotë në të ardhmen, potencialisht i maskuar si një lëshim hapësinor”, ka thënë Kirby.

Gjithashtu, SHBA bëri vlerësimin e saj në lidhje me Japoninë dhe Korenë e Jugut dhe do të ndajë rezultatet përfundimet me aleatët dhe partnerët e tjerë”, ka shtuar një zyrtar i lartë amerikan, shkruan The Guardian.

Gjithsesi, Ministria e Mbrojtjes së Japonisë i dënoi testet.

“Veprimet e fundit të Koresë së Veriut, duke përfshirë këto lëshime raketore që e bëjnë situatën më të tensionuar, kërcënojnë paqen dhe sigurinë e vendit tonë, rajonit dhe komunitetit ndërkombëtar dhe janë krejtësisht të papranueshme”, thuhet në një deklaratë.

“Japonia është veçanërisht e shqetësuar për kthimin e fundit të veriut në testimin e raketave. Dy raketa me rreze të mesme veprimi fluturuan mbi territorin e saj në hapësirën e dy javëve në vitin 2017, duke shkaktuar alarme që paralajmëronin njerëzit të mbuloheshin”, thuhet më tej.

Ndërkohë, forcat amerikane kanë rritur monitorimin dhe mbledhjen e inteligjencës në rajon dhe sanksionet e reja do të vendosen të premten që synojnë të kufizojnë më tej aksesin e Koresë së Veriut në teknologjinë e avancuar që mund të përdorë në programet e saj të armëve.

“Do të ketë një sërë veprimesh të mëtejshme në ditët në vijim”, tha zyrtari amerikan.

Shtëpia e Bardhë thotë se Joe Biden është i hapur për diplomaci dhe do të ishte i përgatitur të takonte liderin e Koresë së Veriut, Kim Jong-un, “kur të ketë një marrëveshje serioze në tryezë”.

“Administrata e Biden beson se çdo marrëveshje e tillë do të duhet të paraprihet nga negociatat në nivel pune, pasi përvoja e takimeve të Donald Trump me Kim rezultuan të pasuksesshme”, tha zyrtari i lartë.

“Ndërsa dera mbetet e hapur për diplomacinë, Shtetet e Bashkuara do të marrin të gjitha masat e nevojshme për të garantuar sigurinë e atdheut amerikan dhe aleatëve tanë”, ka shtuar zyrtari.

Media shtetërore e Koresë së Veriut ka raportuar se Kim kishte urdhëruar zyrtarët që të zgjeronin një strukturë lëshimi satelitor për të lëshuar një sërë raketash që mund të mbanin satelitë me shumë qëllime.

“Ai theksoi se është detyrë fisnike e partisë sonë dhe shkencëtarëve dhe teknikëve të hapësirës që ta kthejnë terrenin e nisjes, të lidhur me ëndrrën dhe ambicien e madhe të shtetit tonë për një fuqi hapësinore, në një bazë ultramoderne të avancuar”, ka thënë lideri korean.

Në anën tjetër, Pheniani këmbëngul se lëshimet e tij satelitore janë pjesë e programit të tij paqësor hapësinor, por OKB-ja beson se ato janë përdorur për të provuar teknologjinë e re të raketave.

Koreja e Veriut kreu tre teste ICBM në vitin 2017 dhe ka kryer gjithsej gjashtë teste bërthamore, përpara se të pezullonte të dy llojet e testimeve përpara samiteve me Trump.

Disa ekspertë besojnë se Koreja e Veriut mund të lëshojë një satelit spiun ose një testim të një ICBM në prill që të përkojë me 110 vjetorin e lindjes së themeluesit të vendit dhe gjyshit të Kim, Kim Il-sung.