Lajme

Shala: Kosova s’ka importuar kurrë më shumë sesa aktualisht nga Serbia


Deputeti i Partisë Demokratike të Kosovës, Ferat Shala

Deputeti i Partisë Demokratike të Kosovës, Ferat Shala, ka thënë se Kosova s’ka importuar kurrë më shumë sesa aktualisht nga Serbia.

Përmes një shkrimi në rrjetin social ‘Facebook’, Shala ka publikuar disa të dhëna që sipas tij tregojnë rritje të importeve të Kosovës me shtetin serb.

“Importet nga Serbia në Kosovë për periudhën kohore Janar – Nëntor të vitit 2022 janë 341.7 milionë euro dhe përbëjnë vlerën më të lartë të importeve nga Serbia që nga viti 2019”.

“Trendi i rritjes së importeve nga Serbia nën Qeverisjen Kurti, është në përmasa të jashtëzakonshme dhe atë ngritja nga viti 2019 në vitin 2020 kur fillon kjo qeverisje, është +25.47%”, ka shkruar Shala.

Shifrat e publikuar nga deputeti, Ferat Shala.

Shala, tutje ka potencuar se gjatë mbledhjes së shifrave totali i importi del të jetë shumë i lartë në raport me Serbinë.

“Ngritja e importeve serbe nga viti 2020 në vitin 2021 është 82.30% apo +124.2 milion euro, ndërsa nga viti 2021 në vitin 2022 është 24.20% apo +66.6 milion euro”.

“Në total ngritja e importeve serbe nën këtë qeverisje është 126.4% apo +190.8 milion euro, nëse krahasohet viti 2022 me vitin 2020 kur në pushtet vije Kryeministri aktual”.

Madje, ai importin e ka krahasuar edhe me Shqipërinë.

Shifrat e publikuar nga deputeti, Ferat Shala.

“Kosova nga Shqipëria ka importuar mallra në vlerë 642.6 milion euro (2020-2022), ndërsa ka importuar nga Serbia në Kosovë për të njëjtën periudhë mallra në vlerë 767.7 milionë euro”.

Sipas tij, “nga shteti serb ka importuar 125.1 milion euro më shumë mallra për këtë periudhë, sesa nga shteti amë Shqipëria”.

“Me ardhjen e këtij pushteti, fillon trendi i rritjes së importeve nga Serbia në krahasim me importet nga Shqipëria. Dhe ky fenomen vërehet edhe nga paraqitja grafike e të dhënave zyrtare mbi importet sipas Bankës Qendrore të Kosovës”.

Më 22 dhjetor Agjencia e Statistikave të Kosovës, ka publikuar një raport me rrjedhat e eksportit dhe importit për muajin nëntor 2022, derisa vendet me pjesëmarrje më të lartë për import ishin Serbia me 6.6 për qind, Maqedonia e Veriut me 5.0 për qind dhe Shqipëria me 4.7 për qind.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore