Shabani kërkesë Këshillit Bashkiak: Të ngrihet komision hetimor për Veliajn

Endrit Shabani, kryetar i Nismës Thurje, ka iniciuar kërkesën për ngritjen e një komisioni të përkohshëm që të kontrollojë procedurat e emërimit të drejtorëve në bashkinë e Tiranës.

Po ashtu edhe të hetojë përse kanë dështuar mekanizmat e auditit të brendshëm sa i përket abuzimit me tenderat e bashkisë.

Kërkesa sakaq ka marrë mbështetjen edhe të anëtarëve të tjerë të opozitës në Këshillin Bashkiak.

Teksa prokuroria bën kontrollin penal të shkeljeve të kryera, në kërkesë thuhet se Këshilli Bashkiak e sheh të domosdoshëm ndërmarrjen e dy veprimeve:

1) Një mbledhje urgjente të Këshillit Bashkiak, ku të thërrasim në interpelancë kryetarin e bashkisë (bazuar në nenit 53, pika 3.b e Rregullores së Këshillit Bashkiak dhe neneve 64, pika d dhe 59, pika 4 e ligjit 139/2015)

2) Ngritja e një komisioni të përkohshëm që të hetojë mbi procedurat e emërimeve të strukturave drejtuese në Bashkinë e Tiranës, dhe mbi mekanizmat e kontrollit të brendshëm (Bazuar në nenin 38, pika 2, të Rregullores së Këshillit Bashkiak).

“Së pari, ne si Këshill Bashkiak kemi detyrimin të zbulojmë çfarë ka çaluar në procesin e rekrutimit dhe emërimit të stafit drejtues të administratës së bashkisë Tiranë. Ligjit 139/2015, neni 64, pika g, përcakton se drejtuesit e drejtorive emërohen dhe shkarkohen nga kryetari i bashkisë”, sipas Shabanit.

Ndaj, referuar kërkesës, do të ishte me rëndësi të kontrollohen procedurat e ndjekura për emërimin e drejtorëve të arrestuar, për të kuptuar se si këta persona kanë arritur të kalojnë filtrat kontrollues duke u vendosur në krye të administratës së bashkisë Tiranë.

“Gjithashtu, kryetari i bashkisë duhet të na raportojë mbi masat që kishte marrë për verifikimin e akuzave që ishin ngritur mbi abuzimin e drejtorëve të korruptuar”.

Së dyti, në kërkesë thuhet se duhet të ngrihet një komision i përkohshëm që të hetojmë në thellësi se ku ka dështuar kontrolli i brendshëm i bashkisë.

“Kuadri ligjor, specifikisht ligji 139/2015, neni 13 dhe neni 43, përcakton se bashkia, përveç mbikëqyrjes dhe inspektimit që i ushtrohet nga qeveria dhe Kontrolli i Lartë i Shtetit, është subjekt edhe i auditit të brendshëm. Gjithashtu sipas rregullores së KB, neni 39, parashikon që përmes komisionit financiar, si dhe përmes audituesit të jashtëm, Këshilli kontrollon administratën e bashkisë në mënyrë se si shpenzohet buxheti”.

Kohëzgjatja e abuzimit të këtyre drejtorëve dhe numri i lartë i tenderave të dyshuar – sipas tij – tregon se këto struktura të kontrollit të brendshëm kanë dështuar.

“Nëse ne nuk arrijmë të kuptojmë problemet sistemike që kanë lejuar këta drejtorë të shpërdorojnë buxhetin e bashkisë rrezikojmë që ky abuzim të vazhdojë edhe pas arrestimit të tyre, duke na detyruar që të vazhdojmë të rrisim taksat vendore si mënyrë për të kompensuar abuzimin që bëjnë drejtuesit e bashkisë. Një praktikë kjo që me sa duket ka vazhduar deri në momentin që flasim, nisur edhe nga vendimet e fundit të Këshillit Bashkiak”.

Shabani vijon me kërkesën duke thënë se në një moment të tillë ku imazhi i bashkisë Tiranë është dëmtuar në opinionin publik, rifitimi i besimit është jashtëzakonisht i rëndësishëm për të siguruar bashkëpunimin e qytetarëve të Tiranës me strukturat e bashkisë, si dhe për të inkurajuar pagimin e taksave dhe tarifave vendore, pa patur frikë se ato do të përfundojnë në xhepat e zyrtarëve të bashkisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.