Serbia pro-ruse duhet t’i japë fund propagandës antishqiptare, thotë politologu serb

Srdjan Cvijiç, politolog serb, në një artikull për revistën International Politics and Society të martën, duke shkruar për rrjedhën e tensionuar të marrëdhënieve mes Kosovës dhe Serbisë, ka thënë se për të krijuar një alternativë reale ndaj regjimit aktual të presidentit serb, Aleksandër Vuçiç, forcat demokratike duhet t’i japin fund propagandës antishqiptare.

“Së pari, qeveria e ardhshme serbe duhet të rifillojë në mënyrë të plotë negociatat e normalizimit. Kjo kërkon t’i jepet fund zhurmës së vazhdueshme dhe kërcënimit të forcës nga propaganda antishqiptare e qeverisë së Vuçiçit. Për të arritur rezultate të qëndrueshme, negociatat e normalizimit duhet të krijojnë një klimë të besimit reciprok”, ka shkruar Cvijiç në artikull.

Ai ka theksuar se normalizimi i marrëdhënieve Prishtinë-Beograd nën ndërmjetësimin e Bashkimit Evropian (BE) nënkupton poashtu se të gjitha marrëveshjet e arritura nga qeveritë e mëparshme serbe duhen të respektohen – pra që Serbia të mos e kundërshtojë anëtarësimin e Kosovës në organizatat ndërkombëtare, përfshirë anëtarësimin e ardhshëm në BE.

Megjithatë, ai ka potencuar se asnjë forcë politike në Serbi nuk mund të ofrojë njohjen de jure të pavarësisë së Kosovës, kryesisht për shkak të propagandës së udhëhequr nga regjimi aktual në 12 vitet e fundit: përfshirja e njohjes de jure të Kosovës në programin e çdonjërës prej partive politike në Serbi, në bazë të analizës së politologut serb, do të ishte vetëvrasje politike.

“Kjo, natyrisht, krijon një sfidë të madhe ndaj parimit aktual të BE-së që nuk dëshiron të pranojë anëtarë të rinj që kanë çështje të pazgjidhura territoriale… Serbia nuk mund të perceptohet si Kali i Trojës i Rusisë në Evropë nga shumica e vendeve anëtare të BE-së. Kjo e dobëson drejtpërdrejt pozicionin e Serbsë në procesin e negociatave me Kosovën”, ka nënvizuar ai.

Ndryshe, shteti serb shpesh vlerësohet si shtet i kapur e tejet problematik, jo vetëm për rajonin e Ballkanit Perëndimor, por edhe për vetë BE-në. Serbia, shtet në mes të kryqëzimit kritik ndërmjet demokracisë dhe autoritarizmit, vazhdon të ndjekë një politikë të pafavorshme ndaj stabilitetit rajon.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.