Serbët në Jug të Kosovës s’u larguan nga institucionet si ata në Veri – “disa janë të instrumentalizuar nga Beogradi, të tjerët jo”

Që nga përfundimi i luftës në Kosovë, të gjitha qeveritë e Serbisë i kanë trajtuar serbët e Kosovës, të ndarë në serbë të Jugut dhe të Veriut, por autoritetet e tanishme në Beograd, këtë ndarje e kanë theksuar edhe më shumë.

Ndarja u bë evidente së fundmi kur serbët në Veri vendosën t’i braktisin institucionet, serbët në Jug nuk i përcollën me mas të njëjtë dhe s’iu bashkuan thirrjeve të Listës Serbe për bojkotim të institucioneve të Kosovës.

Një gjë të tillë e ka dëshmuar edhe deklarata e fundit e zëvendës presidentit të Listës Serbe dhe ish-kryetarit të Komunës së Shtërpcës – komunë e banuar me shumicë serbe në Jug të Kosovës – Dalibor Jevtiç.

Ai ka bërë thirrje që edhe serbët në Jug të Kosovës të largohen nga institucionet.

“Serbët në përgjithësi nga jugu i Ibrit duhet të largohen nga institucionet, dhe kjo është një çështje që ende është e hapur. Nëse nuk ndryshon situata, nëse nuk ndryshon kursi dhe qëndrimi i Kosovës, jam pothuajse i sigurt se të njëjtin vendim do ta marrin edhe serbët në jug”, kishte deklaruar ai në një intervistë për Euronews Serbia.

Me faktin se ka një vijë ndarëse në mes të serbëve nga Veriu dhe atyre nga Jugu, pajtohet edhe kryetarja e Lëvizjes Evropiane të Serbëve nga Kosova, Rada Trajkoviç.

Sipas saj, një gjë e tillë është dëshmuar rishtazi edhe pas thirrjes së Listës Serbe për të bojkotuar institucionet e Kosovës.

“Ndryshe nga serbët në Veri, serbët në Jug nuk kanë marrë një ftesë të qartë nga Beogradi për t’u larguar nga institucionet. Dhe sikur ta bënin, reagimi i tyre ndaj asaj thirrjeje me siguri nuk do të ishte aq unik sa reagimi i serbëve në Veri”, ka thënë Trajkoviç për Albanian Post.

“Serbët në jug janë të vendosur në enklava dhe gjeografikisht nuk mund të mbështeten në Serbi dhe të marrin prej saj të njëjtin nivel të logjistikës dhe të mbështetjes që kanë serbët nga Veriu në çdo aspekt”.

Në leximin e saj të situatës aktuale politike, Trajkoviç mendon se Veriu në vitet e fundit ka marrë qartë monopolin për përfaqësimin e serbëve në Kosovë dhe vendimmarrjen për funksionimin dhe fatin e komunitetit serb.

“Është fakt se një pjesë e mirë e serbëve në jug janë integruar në shoqërinë kosovare. Nga ana tjetër, serbët në jug gjithmonë janë mbështetur më shumë në Kishën Ortodokse Serbe si një institucion në të cilin besojnë. Kisha është më e afërt dhe më me ndikim te serbët në jug sesa qeveria e shtetit serb”.

Për Dritëro Arifin, njohës i situatës politike dhe ligjërues universitar, ndarja nuk është vec gjeografike. Ai beson se dallimi qëndron te qasja që të dyja palët kanë në raport me shtetin e Kosovës.

“Mirëpo kjo nuk do të thotë që ne të heqim dorë nga Veriu, në të njëjtën kohë veprimet e Qeverisë duhet të analizohen në nivele politike se çfarë impakti mund të kenë në këtë drejtim”, ka thënë Arifi për Albanian Post.

“Lista Serbe” vendosi të shtunën e 5 nëntorit që pjesëtarët e saj të largohen nga institucionet e Kosovës.

Kjo, pas një takimi të zhvilluar në mesditën e së shtunës në Zveçan.

Serbët nuk do të kthehen në institucionet e Kosovës deri në momentin kur Qeveria e Kosovës do të tërheqë vendimin për targat dhe fillon formimin e Asociacionit për komunat me shumicë serbe.

Kryetari i Listës Serbe (njëkohësisht ministri për Komunitete dhe Kthim), Goran Rakiç, u dorëhoq nga pozita të cilën e ka drejtuar pak më shumë se një vjet e gjysmë.

Edhe Igor Simiç, i cili është deputet në radhët e Listës Serbe ka dhënë dorëheqje nga kjo pozitë.

Serbët kanë vendosur që të largohen edhe nga gjyqësori, Policia, Dogana.

“Ne kemi vendosur të largohemi nga të gjitha institucionet politike, Kuvendi, Qeveria, dhe nga katër komunat në veri të Kosovës, por edhe që të largohen serbët nga gjyqësori, policia si dhe stafi administrativ në katër komunat në veri”, theksoi Rakiç pas takimit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.