Sëmundjet gjenetike të zemrës mund të kurohen për të parën herë

Shkencëtarët do të zhvillojnë kurën e parë në botë për sëmundjet gjenetike të zemrës duke rishkruar ADN-në.

Kjo lëvizje është përshëndetur si një “moment përcaktues” për mjekësinë kardiovaskulare.

Një ekip global ekspertësh nga Britania e Madhe, SHBA-të dhe Singapori po bashkojnë forcat për të krijuar një vaksinë për pacientët për të shpëtuar mijëra jetë.

Zhvillimi i saj është mbështetur nga një grant prej 30 milionë paund nga Fondacioni Britanik i Zemrës.

Ekipi do të përdorë teknika precize gjenetike për herë të parë në zemër për të hartuar dhe testuar kurën e parë për sëmundjet e trashëguara të muskujve të zemrës.

Deri më tani, studimet te kafshët kanë treguar se teknikat funksionojnë.

Problemet e trashëguara të muskujve të zemrës shkaktohen nga anomali të ndryshme në zemër, por mund të shkaktojnë vdekje të papritur ose dështim progresiv të zemrës.

Në Mbretërinë e Bashkuar, afro 260 mijë njerëz e kanë këtë gjendje, e cila mund të shkaktojë vdekje të papritur në çdo moshë.

Ekipi që qëndron pas hulumtimit të ri u zgjodh nga një panel këshillues i kryesuar nga Patrick Vallance, këshilltari kryesor shkencor i qeverisë së Mbretërisë së Bashkuar.

Profesor Hugh Watkins, hetuesi kryesor i projektit CureHeart, ka treguar se kardiomiopatitë janë “vërtet të zakonshme” dhe preknin një person në çdo 250 në mbarë botën.

“Kjo është mundësia për të lehtësuar familjet nga shqetësimi i vazhdueshëm i vdekjes së papritur, atakut të zemrës dhe nevojës së mundshme për një transplant”, ka thënë ai.

Shpresa e shkencëtarëve është që të korrigjojnë përgjithmonë gjenet mutante të përfshira në shkaktimin e këtyre problemeve të zemrës.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.