Sela: S’dua të besoj që Kurti ka gisht në këtë që po i ndodh ASH-së

Kryetari i partisë Aleanca për Shqiptarët në Maqedoni të Veriut, Ziadin Sela, ka thënë se është takuar me kryeministrin e Kosovës, Albin Kurtin dhe ky i fundit i ka premtuar se Lëvizja Vetëvendosje nuk do të marrë pesë në zgjedhjet parlamentare që do mbahen gjatë muajit maj në Maqedoni të Veriut.

“Kam pasur një takim me Albin Kurtin dhe ai më tha që Lëvizja Vetëvendosje nuk merr pjesë në zgjedhje në Maqedoni të Veriut. Për Bekim Qokun tha sa ka dëshirë të kandidojë për deputet”, tha ai në një intervistë për emisionin “KallxoPernime” të shtunën.

Ai e ka komentuar edhe mbështetjen e kryeministrit Kurti për opozitën shqiptare në RMV dhe ka theksuar se “unë për veti i kam dalë borxh Albin Kurtit sa herë që ka qenë e nevojshme”.

“Kam qenë prezent në fushata të tij në zgjedhje parlamentare në Kosovë dhe nuk dua të besoj që Albin Kurti ka gisht në këtë që po i ndodh Aleancës për Shqiptarët”, shtoi Sela.

Sela ka potencuar se në Maqedoni të Veriut ka shumë aktorë politik që tentojnë “ta shfrytëzojnë Lëvizjen Vetëvendosje dhe imazhin e saj”.

“Ka kryetar të parive që më shumë flasin për Vetëvendosjen se për partinë e vet. Zoti Kurti duhet të t’i këtë parasysh të gjitha gjërat që i thashë”, potencoi ai.

Ndryshe, shqiptarët në Maqedoni të Veriut kanë dalur me dy kandidatë për president, duke minimizuar kështu gjasat që të fitojë presidenti aktual Stevo Pendarovski, që ka orientim pro-perëndimor dhe duke i hapur rrugë kandidates së VMRO-DPMNE-së – partisë nacionaliste maqedonase.

Arben Taravari, kryetar i Gostivarit – komunë e banuar me shumicë shqiptare – është propozuar nga opozita shqiptare (Lëvizja Besa e Bilall Kasamit, Lëvizja Demokratike e Izet Mexhitit, Alternativa e Afrim Gashit, dhe eksponentë të Lëvizjes Vetëvendosje në Maqedoni të Veriut), kandidat për president të shtetit maqedonas, në zgjedhjet presidenciale.

Ndërsa Bashkimi Demokratik për Integrim (BDI) – partia më e madhe shqiptare në Maqedoni të Veriut – nga radhët e së cilës së fundmi u zgjodh edhe kryeministri i parë shqiptar atje, Talat Xhaferi, doli me kandidatin e saj, Bujar Osmani, aktualisht Ministër i Punëve të Jashtme.

Më 28 janar deputetët e Kuvendit të Maqedonisë së Veriut votuan për qeverinë teknike e cila do të drejtohet nga një shqiptar: ish-komandanti i Ushtrisë Çlirimtare Kombëtare (UÇK), i cili për një kohë drejtoi edhe legjislativin maqedonas, u fut në historinë moderne të Maqedonisë së Veriut si shqiptari i parë që udhëheq me postin më të rëndësishëm në këtë shtet.

Ai u zgjodh kryeministër me 65 vota pro, vetëm 3 kundër dhe asnjë abstenim nga gjithsej 68 deputetë të pranishëm në sallë – një moment historik që reflekton kontributin e shqiptarëve në ndërtimin e shtetësisë së Maqedonisë së Veriut. Deputetët e VMRO-DPMNE-së nuk morën pjesë në votim. Gjithashtu, në votim nuk morën pjesë as opozita shqiptare.

Xhaferi në postin e kryeministrit zëvendëson liderin e Lidhjes Social-Demokrate (LSDM), i cili dha dorëheqje nga drejtimi i Qeverisë së Maqedonisë së Veriut, bazuar në ligjin për zgjedhje, i cili parasheh që 100 ditë para zgjedhjeve paralametare të emërohet një qeveri teknike që do të përkujdeset për organizimin dhe mbarëvajtjen e zgjedhjeve më 8 maj.

Dy kandidatë shqiptarë për president në Maqedoni të Veriut, çfarë pritet të ndodhë tash?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.