Guvernatori i Bankës së Shqipërisë, Gent Sejko ka ndarë disa nga sfidat që kanë prekur sektorët e ndryshëm ekonomikë.
Përveç inflacionit, ai theksoi se inteligjenca artificiale dhe digjitalizimi janë ndër më kryesoret.
“Shoqëritë, ekonomitë dhe sistemet tona financiare janë nën presion nga burime të ndryshme: luftërat, tensionet gjeopolitike në rritje, ndryshimet demografike, përshkallëzimi i ngjarjeve ekstreme klimatike, inteligjenca artificiale dhe digjitalizimi i financave e parasë. Këto sfida kanë shkaktuar pasoja negative në zinxhirët e prodhimit dhe të furnizimit, kanë ndikuar tregjet e punës”, thotë ai.
Si rezultat, bën me dije guvernatori “kanë nxitur ndryshime strukturore të cilat kanë ndikuar produktivitetin, kostot, stabilitetin e çmimeve, si dhe stabilitetin e përgjithshëm makroekonomik e financiar”.
Sejko vlerësoi se ky tranzicion ku disa fusha po zëvendësojnë sektorët tradicional të ekonomisë po rrit presionin ndaj tregjeve të punës.
“Rezultat i këtij tranzicioni janë: aktiviteti ekonomik i përshpejtuar, pozicioni i përmirësuar i sektorit të jashtëm dhe qëndrueshmëria e rritur. Megjithatë, ky tranzicion ushtron presion edhe mbi tregjet e punës tashmë të prekura nga emigracioni”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
