“S’e thyen as Millosheviç-in sanksionet”, propagandisti rus gëzohet me deklaratën e Milanoviç-it: Mirë që ka njerëz të tillë në Evropë

Propagandisti kryesor i presidentit rus, Vladimir Putin, Vladimir Solovjov, përmes emisionit të tij në kanalin shtetëror rus Rusia 1, lavdëroi presidentin e Kroacisë, Zoran Milanoviç dhe transmetoi deklaratën e tij në të cilën ai tha se “Uashingtoni dhe NATO po bëjnë një luftë kundër Rusisë përmes Ukrainës”.

“Sado që Perëndimi përpiqet të bindë botën se nuk po përgatiten të bëhen pjesë e konflikt, të gjithë e kanë kuptuar prej kohësh që lufta është në ecje të plotë”, tha Solovjov dhe shtoi se “presidenti i Kroacisë nuk është njeriu i fundit në Evropë që e thotë këtë”.

Milanoviç tha të enjten se Kroacia nuk është në luftë me Rusinë, por se Shtetet e Bashkuara të Amerikës janë në luftë me Rusinë në Ukrainë dhe se pa një marrëveshje ndërmjet tyre, e cila nuk është në dukje, lufta nuk do të ndalet.

“Uashingtoni dhe NATO po bëjnë një luftë kundër Rusisë përmes Ukrainës. Dhe anasjelltas. Megjithatë, nëse nuk keni një qëllim përfundimtar, nëse nuk keni një plan, atëherë përfundon si Afganistani”, tha Milanoviç.

“Plani nuk mund të jetë largimi i Putinit. Pjesë e planit nuk mund të jenë sanksionet. Kjo është e pakuptimtë. Nuk do të arrijmë asgjë. Nuk e thyen as Millosheviç-in me sanksione. Ata shkojnë nga lufta në luftë. Çfarë duhet të jemi? Skllevërit amerikanë?”, shtoi presidenti kroat.

Solovjov, natyrisht, ishte i kënaqur nga deklaratat e Milanoviç-it dhe një nga të ftuarit në studio, kryetari i komisionit të mbrojtjes në parlamentin rus, Andrej Kartapolov, tha se “është mirë që politikanët që mendojnë për njerëzit e tyre si presidenti i Kroacisë kanë filluar të shfaqen”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.