Shqipëria

Së shpejti Shqipëria me Akademinë Ajrore të Aviacionit Civil


Ministrja e Infrastrukturës dhe Energjisë, Belinda Balluku, deklaroi se zhvillimi i shpejtë i Aviacionit Civil në vendin tonë ka nxjerrë nevojën për rritjen e kapaciteteve të burimeve njerëzore.

Ndaj – bëri me dije ajo – do të krijohet Akademinë Ajrore me fokus rritjen e kapaciteteve njerëzore për të gjithë industrinë e Aviacionit Civil.

Duke marrë fjalën në Kuvend, për projektligjin që ka të bëjë me aviacionin civil, Balluku tha se, “një strategji kombëtare që kemi nisur në 2019, është ajo që sot po zbatohet dhe të gjitha arritjet kanë qenë të parashikuara dhe të arritura sipas kësaj strategjie”.

“Trafiku ajror në Shqipëri ka një rritje progresive, numri i fluturimeve parashikohet të rritet me 10% gjatë vitit 2024, krahasuar me 2023 dhe 55% krahasuar me 2019, si viti i fundit normal para pandemisë. Shqipëria gjatë vitit 2023 u rendit ndër vendet e para në Evropë për rikuperimin e trafikut, me një rritje 31%. Parashikimi për 2024 tregon për një rritje me 32 % të fluturime terminale krahasuar me 2023″.

Ajo gjithashtu solli në vëmendje disa projekte të rëndësishme që përfshijnë aeroportin e Vlorës, si edhe atë të Gjirokastrës. Më tej, ajo shtoi se aeroporti i Vlorës do të jetë më i madhi në rajonin e Ballkanit Perëndimor.

“Po punojmë me ritme të shtuara që të nisim operimet në pranverën e 2025-ës, në një tjetër aeroport ndërkombëtar në jug të vendit, në Aeroportin e Vlorës. Në dhjetor 2024 ne mbyllim të gjitha punimet civile dhe hapim procesin e licencimit të aeroportit të Vlorës, që do të jetë më i madhi në Ballkanin Perëndimor, duke e çuar Shqipërinë në një hap drejt fluturimeve transoqeanike”.

Ministrja theksoi se shumë shpejt do të nisin procedurat për garën ndërkombëtare dhe ndërtimin e aeroportit të Gjirokastrës, duke e bërë vendin tonë me 4 aeroporte ndërkombëtare nga jugu, në veri të vendit.

“Ndërsa investime të reja parashikohen për mirëmbajtjen e avionëve apo dhe hangarët”.

 

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore